Муаммои таълими исломӣ дар Тоҷикистон
Дар Тоҷикистон кӯдакон дар сатҳи қонунгузорӣ аз имконияти омӯхтани забони арабӣ барои хондани Қуръон маҳрум мебошанд. Дар ин хусус раиси шӯъбаи иттиҳодияҳои динии Кумитаи оид ба корҳои дин, танзими анъана ва ҷашну маросимҳои миллӣ назди ҳукумати ҶТ Ҳусейн Шокиров хабар дод.
“Якчанд масҷидҳо барои ташкил намудани чунин курсҳо ҳуҷҷатҳои лозимаро пешниҳод карданд, вале тибқи қонунгузорӣ танҳо Вазорати маориф ва илми Тоҷикистон ҳуқуқ дорад, то ин ки расман барои ташкили чунин курсҳои таълими иҷозат диҳад. То ҳол бо вазъиятҳои ба мо номаълум ягон масҷид дар кишвар чунин иҷозати расмиро нагирифтааст”, иброз намуд ӯ гӯё аз ҳеҷ чиз бехабар бошад. Охир ӯ хубтар медонад, ки барои чи масҷидҳо иҷозати расмӣ оиди таълими додани Ислом гирифта наметавонанд.
Ёдрас мекунем, ки соли 2010 ба ватан баргардондани оммавӣ донишҷӯён аз донишкадаҳои динии хориҷа шурӯъ гардида буд. Ин амал пас аз баёноти президент Эмомалӣ Раҳмон гӯё марказҳои Исломӣ хусусияти экстремистӣ доранд, ба вуқӯ пайваст. “Мутаасифона, дар аксарият ҳолат наврасон аз назорат баромада, дар назди муллоҳо таълим намегиранд, балки ба роҳи терроризму экстремизми динӣ пайванд хоҳад шуд”, иброз намуда буд Эмомалӣ Раҳмон. Чи тавре ки Кумитаи оид ба корҳои дин қайд намуда буд дар он замон 3 650 шаҳрванди Тоҷикистон берун аз кишвар таҳсилоти динӣ мегирифтанд, аз ин шумора 3 324 нафар бошад ба ватан баргардонида шуданд.
Имрӯз дар Тоҷикистон ҳамагӣ як Донишкадаи Исломӣ фаолият мекунад, ки дар он 1400 нафар таҳсилот мегиранд. Дар кишвар расман фаолияти ҳамаи мадрасаҳо манъ карда шуданд. Ду сол қабл, аз рӯи набудани бино барои таҳсилот гимназияи ягонаи Исломӣ дар кишвар баста шуд. Ғайр аз ин нафақат наврасон, балки калонсолони аҳолӣ низ аз таҳсилоти динӣ маҳруманд. Ҳар намуди таҳсилоти диние, ки дар зери назорати ҳукумат қарор надошта бошад, экстремистӣ ба ҳисоб меравад, аз он ҷумла таҳсилот бо воситаи интернет низ ба ин шомил мебошад. Ҷолиби диққат аст, ки ҳатто ба имом-хатибони дарборӣ низ бо воситаи интернет таълимоти Исломӣ гузарондан манъ карда шудааст.
