Полиси Русия муҳоҷирони меҳнатиро латукӯб намуд
Чи тавре ки радиои Озодӣ иттило медиҳад, мақомоти қудратии Русия муҳоҷирони меҳнати аз Осиёи Марказиро якчанд соат латукӯб намуданд.
Ба гуфтаҳои муҳоҷирони меҳнатӣ, қазияи мазкур шаби 12-уми декабр ба вуқуъ пайвастааст — кормандони мақомоти ҳифзи ҳуқуқ шаҳрвандони Қирғизистон, Ӯзбекистон ва Тоҷикистонро дар автопарк дастгир намуданд, ки охирин дар онҷо ҳамчун ронанда кору фаъолият мекунанд, пас аз ин дар давоми якчанд соат онҳоро латукӯб карданд.
Дар ҳамсӯҳбат бо хабарнигорон корманди сафоратхонаи Тоҷикистон ҳодисаи ҷойдоштаи мазкурро тасдиқ намуд. «Дар миёни дастгиршудагон — 10 нафар шаҳрвандони Тоҷикистон аст, ки яке аз онҳо аз тарафи корманди ОМОН латукӯб гардидааст», — иброз намуд ӯ ба хабарнигорон.
Ҷабрдида Самарбек Осмон уғли қазияи мазкурро бо тафсилот ба хадамоти радиои Свободаи қирғиз нақл намуд. Тақрибан соатҳои 22 шаб кормандони ОМОН ба таваққуфгоҳи автопарк омаданд. «Ҳамаи ронандагонро дастгир намуданд. Ҳуҷҷатҳоямонро гирифта, моро то бомдод латукӯб карданд. Барои надоштани шиноснома маро беморхона қабул накард. Айни замон дар манзили зист қарор дорам ва ҳолатам вазнин аст. Қабурғаҳоям шикастааст. Дар рӯям пайи латукӯб нест, вале танаам пур аз доғҳои кабуд аст. Ҳатто суол кардан изн надоданд, ки бо сабаби чи моро латукӯб мекунанд. Ба утоқе даҳ нафари медароварданд, се нафар бо таёқи резинӣ латукӯб мекард. Ҳамаи онҳо дар рӯйҳояшон ниқоб доштанд. Онҳо аз кадом шӯъба ҳастанд ва ё киянд дида натавонистем. Баъзеҳоро ба хоидан ва бо об фурӯбарии қоғази муҳоҷиратиро маҷбур мекарданд», — мегӯяд ҷабрдида.
Ҷабрдидагон тасдиқ мекунанд, ки онҳоро дар биное латукӯб намуданд, ки дар суроғаи Воронежская 1 ҷойгир аст, айнан дар ҳамин суроға раёсати давлатӣ оид ба ҳаракати роҳи Хабаровск ҷойгир шудааст. Ба гуфтаи шаҳрванди Қирғизистон Жиргалбек, пеш аз латукӯб намудан кормандони полис камераҳои назоратиро бо чизе пӯшониданд.
«Онҳо камераҳои назоратиро бо скотч пӯшониданд. Моро амр карданд, ки ба поён нигоҳ кунем ва дар ин асно моро латукӯб мекарданд. Ба сӯи мо фарёд мекарданд, ки гӯё мо чароғаки сурхро мегузарем, савораҳои бидуни чиптаро фуруд меорем, авбошӣ мекунем ва ҳоказо. Онҳо аз рӯи мо ҳазар мекарданд. 4-5 нафарро сахт латукӯб карданд. Соати 4 пагоҳӣ раҳоӣ намуданд ва гуфтанд, ки тибқи ҳаррӯза ба кор равем. Ҳуҷҷатҳо ва телефонҳои баъзеҳоро барнагардониданд», — мегӯяд муҳоҷири меҳнатии ҷабрдида.
Ёдрас мекунем, ки дағалона поймол шудани ҳуқуқҳои шаҳрвандони Осиёи Марказӣ ва ҷиноятҳои гуногуни карда шуда нисбати онҳо дар Русия аллакай кори одатӣ шудааст, вале режимҳои кишварҳои Осиёи Марказӣ ба чунин корҳо хомӯширо интихоб мекунанд.
