Содирот меафзояд: Тоҷикистон маҳдудияти истифодаи нерӯи барқро барои аҳолӣ ҷорӣ кард
Дар Тоҷикистон аз 5-уми январ шурӯъ карда маҳдудиятҳои расмӣ дар истифодабарии нерӯи барқ аз ҷониби аҳолӣ ҷорӣ карда шуданд. Дар айни замон, ба ғайр аз сокинони пойтахт ва биноҳои бисёрқабата дар шаҳрҳои калон, нерӯи барқ ба аҳолӣ аз соати 6-и субҳ то 11-и шаб дода мешавад, шабона сокинони ноҳияҳо ва минтақаҳо бидуни нерӯи барқ мемонанд.
Ёдрас мекунем, ки дар як ҷаласаи корӣ бо иштироки аъзоёни ҳукумат, сарони вилоятҳои Суғду Хатлон, шаҳри Душанбе, ноҳияҳои пойтахт, шаҳрҳо ва вилоятҳои тобеи ҷумҳурӣ, ки рӯзи 15-уми декабр баргузор шуда буд, Президенти Тоҷикистон Эмомалӣ Раҳмон аҳолиро ба истифодаи сарфаи нерӯи барқ даъват карда буд. Дар акси ҳол, ӯ таҳдид кард, ки маҳдудият ҷорӣ мекунад. Қабл аз ин, аҳолии кишвар, ба истиснои сокинони пойтахт, дар тӯли зиёда аз як моҳ, аз аввали ноябр то 10-уми декабр, аз қатъшавии доимии нерӯи барқ азият мекашиданд, нерӯи барқ ба аҳолӣ аз соати 8-и субҳ то 17-и шом дода мешуд.
Ҷолиби диққат аст, ки бинобар иттилои Азия-Плюс бо истинод ба Кумитаи омори назди президенти ҷумҳурӣ, дар моҳҳои охири соли 2020, Тоҷикистон тадриҷан интиқоли нерӯи барқро ба ҳамсоя кишварҳо тақрибан 80% афзоиш дод. Ҳамин тавр, моҳи сентябри соли гузашта нерӯи барқи Тоҷикистон ба истеъмолкунандагони хориҷӣ ба маблағи беш аз 1,9 миллион доллар, моҳи октябр — тақрибан 2 миллион доллар, моҳи ноябр — беш аз 2,7 миллион доллар ва моҳи декабр — қариб 3,4 миллион доллар дода шудааст.
