Қасри тиллоии Президенти Ӯзбекистон
23-уми феврали соли равон радиои Озодлик дар бораи қасри тиллоии Президенти Ӯзбекистон Шавкат Мирзиёев маводи вокунишдорро нашр кард.
Аз ҷумла, дар маводи фошкунанда гуфта мешавад, ки як моҳ пас аз савгандёдкунӣ президент Мирзиёев ба парлумон муроҷиат кард. Дар суханронии худ 14-уми январи соли 2017 президент ба бисёр мавзӯъҳо, аз ҷумла таъмини шаффофияти фаъолияти сохторҳои давлатӣ ва мубориза бо коррупсияро баррасӣ намуд.
Ғайр аз ин, Мирзиёев дар бораи муносибати масъулиятнокӣ ба буҷа сухан ронд: «Буҷаи давлатӣ номаҳдуд нест, аз ин рӯ, мо бояд онро бо мақсадҳои мушаххас оқилона истифода барем. Ба сарвати кишвар ва мардум бояд эҳтиёткорона муносибат кард».
Аммо, ҳамагӣ чанд ҳафта пас аз ин суханронӣ, ширкатҳои давлатии Ӯзбекистон ба сохтмони як лоиҳаи махфӣ шурӯъ карданд, ки оқилона ва шаффоф будани истифодаи маблағҳои андозсупорандагонро зери шубҳа қарор медиҳад: сухан дар бораи маҷмааи истисноии истироҳатгоҳ бо обанбори нав меравад, ки махсус барои Мирзиёев сохта шудааст.
Маҷмааи мазкур, ки дар қаламрави мамнӯъгоҳи биосфера ҷойгир аст ва аз ҷаҳон бо гузаргоҳҳои амниятӣ ва деворҳои бо симхор печида шуда, таворабанд шудааст мавзӯи тафтишоти рӯзноманигорони Радиои Озодлик гардид. Онҳо бо бисёр одамоне сӯҳбат карданд, ки дар бунёди маҷмаа мустақиман ширкат доштанд ё аз сохтмони он воқиф буданд.
Ин манбаъҳо аз тарси таъқиби мақомот ё корфармоёни худ бо шарти ниҳонӣ гуфтанд, ки як маҷмааи истироҳатии боҳашамат барои Мирзиёев ва оилаи ӯ дар иншооте воқеъ дар тақрибан 100 км дуртар аз Тошканд ҷойгир аст бунёд шудааст. Тибқи баъзе манбаъҳо, арзиши лоиҳа якчанд сад миллион доллар арзиш дошта, оиди дастрасии кушодаи ин иншоот ва обанбори воқеъ дар наздикии он ягон санади расмӣ вуҷуд надорад, ки сохтмони он дар соли 2019 ба итмом расидааст.
Ҳамчунин маълум гардид, ки аз болои қаламрави маҷмаа минтақаи ғайрипарвозӣ ҷорӣ карда шудааст, дар даромадгоҳи қаламрави маҷмаа аз сохтмончиён телефонҳои мобилӣ мусодира карда шуда, ҳуҷҷатҳои сохтмон таҳти унвони «махфӣ» қарор дорад, гуфт менеҷери ширкати «Ӯзбекистон Темир Йӯллари», ки фармоишгари лоиҳа мебошад.
Баъдтар масъулин кӯшиш карданд, ки маълумот дар бораи қасри тиллоии президент Мирзиёевро рад кунанд ва гуфтанд, ки ин маҷмаа гӯё барои коргарони роҳи оҳан ва оилаҳои онҳо, инчунин барои сайёҳон сохта шудааст.
Ҳамзамон, мақомот оиди саволҳои зиёди дигар посух надоданд, масалан, чаро дар болои маҷмаа минтақаи ғайрипарвозӣ ҷорӣ аст, чаро телефонҳои мобилӣ аз сохтмончиён мусодира карда мешуд ва чаро маҷмаа дар махфияти комил нигоҳ дошта мешавад.
