• Home »
  • Habarho »
  • Дар Русия духтараки тоҷикро таҷовуз карда ба қатл расонданд

Дар Русия духтараки тоҷикро таҷовуз карда ба қатл расонданд

Дар Серпухови вилояти Маскав духтараки 5 сола аз Тоҷикистон Ҳувайдо Тиллозода таҷовуз шуда бераҳмона ба қатл расонда шуд.

Тибқи иттилои расонаҳо Ҳувайдои 5 сола санаи 22 июл дар вақти сайру гашт аз назди биное, ки бо ҳамроҳии оилаашон зиндагӣ мекунанд рабуда шуд. Духтаракро якчанд соат кофтуков намуда, ҳамаи буттаҳоро дида баромаданд. Номбурдаро рӯзи дигар соати 4 саҳар дар назди хати роҳи оҳани завод ёфт намуданд. Наҷотдиҳандагон сумкаи варзиширо пайдо намуданд, ки дар он ҷасади Ҳувайдо ёфт гардид.  Тибқи хулосаи мутахассисони тиббӣ, духтаракро аввал таҷовуз намуданд, сипас бо зарбаи корд ба қатл расонданд.

Шӯъбаи кумитаи тафтишотӣ дар вилояти Маскав иттилоъ додааст, ки гумонбаршуда дар содир намудани ҷиноят сокини 28 солаи маҳаллӣ Александр Сёмин дастгир карда шуд. Гуфта шудааст, ки дар хонаи номбурда пайҳои пойафзолу панҷаҳои духтарак ёфт гардид. Тибқи яке аз ривоятҳо, гумонбаршуда дар ҷиноят тавонист духтаракро бо бозича дар вақти бози доштани ӯ дар ҳавлии истиқоматгоҳ фиреб кунад.

Санаи 25-уми июл дар шаҳри Кӯлоб ҷанозаи Ҳувайдо баргузор гардид. Духтаракро дар қабристони маҳаллаи Шамсиддини Шоҳин дар паҳлуи қабри бобояш ва бибияш ба хок супурданд.

Абдусалом Саидов падари Ҳувайдо мегӯяд, ки пас аз як ҳафта ӯ ба Русия бармегардад ва барои қотили духтараш ҳукми сахтро талаб менамояд. Ба гуфтаи Абдусалом Саидов, алҳол баъзе одамон тахмин карда истодаанд, ки қотилро дар додгоҳ ҳамчун руҳан носолим эътироф мекунанд.

«Чи тавр руҳан носолим аст, ҳол он ки хизмати ҳарбӣ гузаштааст. Айнан барои ҳамин ман дар ҳамаи маҷлиси судӣ иштирок мекунам ва барои қотил ҳукми сахтро талаб менамоям», — мегӯяд номбурда.