Суғд: 18 нафар барои мансубият ба ҷараёни «Салафия» ба додгоҳ кашида шуданд
Додгоҳи ноҳияи Бобоҷон Ғафурови вилояти Суғд ба баррасии парвандаи ҷиноӣ алайҳи 18 нафаре, ки ба ҳаракати исломии Салафия муттаҳам мешаванд, оғоз кард. Муҳокима пушти дарҳои баста дар СИЗО-и рақами 2-и шаҳри Хуҷанд, бидуни иштироки хешовандони судшавандаҳо ва матбуот баргузор мешавад. Ҳама айбдоршавандаҳо сокинони деҳаи Ҳистеварзи ноҳияи Бобоҷони Ғафуров мебошанд, ки моҳи феврали соли равон аз ҷониби Вазорати корҳои дохилии вилояти Суғд барои мансубият дар ҷараёни Салафия дастгир карда шуданд. Яке аз айбдоршавандаҳо маъюби гурӯҳи якум аст; хешовандонаш ӯро ҳар рӯз бо занбара ба толори суд меоранд.
Модарони айбдоршавандаҳо изҳор намуданд, ки иттиҳомот алайҳи писаронашон сохта аст ва онҳо ба ҳеҷ гуна ҳаракате иртибот надоранд. Ҳама далелҳои айбдоркунӣ, ба гуфтаи модарон, зери шиканҷа дода шудааст. Яке аз айбдоршавандагон дар додгоҳ шоҳиди додааст, ки пас аз боздошт ӯ зери шиканҷа ба эътирофи худ имзо гузоштааст. Хешовандон инчунин изҳор доштанд, ки ба ҳимоятгарон танҳо баъд аз панҷ рӯзи боздошт иҷозаи мулоқоти мизоҷон дода шудааст. Ба гуфтаи раҳбари созмони ҳифзи ҳуқуқи «Перспектива +», Ойниҳол Бобоназарова ин як таҷрибаи густардаест, ки вақте боздоштшуда бори аввал дар ҷараёни тафтишоти пешакӣ барои ба даст овардани иқрори худ шиканҷа мешавад ва танҳо пас аз он ба ҳимоятгар иҷозат дода мешавад, ки бо зерҳимояи худ мулоқот кунанд.
Истифодаи шиканҷа аз ҷониби мақомоти тафтишоти пешакӣ ва бадрафторӣ бо боздоштшудагон як мушкилии паҳншуда дар Тоҷикистон мебошад. Танҳо дар се моҳи аввали соли 2017 аъзои Эътилофи Ҷомеаи Шаҳрвандии зидди шиканҷа ва беҷазоӣ дар кишвар 38 шикоят дар бораи истифодаи зӯроварӣ аз ҷониби мақомоти амният ба қайд гирифта шуданд. Ҷабрдидагон мавриди шиканҷаи ҷисмонӣ қарор гирифтанд, аз ҷумла латукӯб бо бастани пой ва дастҳо, гузаронидани қувваи барқ аз нохунҳои даст ва закар, латукӯби сар ва гурдаҳо ва рехтани оби хунук аз болои сар. Аммо, на ҳама ҷинояткорон ба додгоҳ мерасанд ва аксар вақт парвандаҳои ҷиноӣ на тибқи моддаи 143 қ 1 Кодекси ҷиноятии Тоҷикистон, яъне (шиканҷа), балки тибқи моддаҳои дигар — «Суиистифода аз мақоми хидматӣ», «Баромадан аз ваколатҳои мансабӣ» ё «Бепарвоӣ» баррасӣ мешаванд. Системаи адлия дар Тоҷикистон тавре амал мекунад, ки боздоштшудагон ягон имконияте надоранд, ки шиканҷа нисбати онҳо содир шударо исбот кунанд.
Фаъолони ҳуқуқи башар худи далели муттаҳам кардани шаҳрвандони кишвар ба ҷараёни салафияро, ки гӯё ин як ҷиноят аст, интиқод мекунанд. Таъқиби сокинон бо мавқеи фаъоли динӣ як қадами дигари режим барои татбиқи стратегияи худ барои пешгирии эҳёи исломи сиёсӣ дар кишвар мебошад.
