Ӯзбекистон: намоз ҷоиз нест, консерт иҷозат аст
Пас аз ду рӯзи манъи баргузории намози ид дар масҷидҳои пойтахт, дар маркази Тошканд консерти бошукӯҳи «Божалар Шоу» баргузор шуд. Видео навори мувофиқ дар шабакаи Youtube- и «ЯнгиКулгу» пайдо гардид. Дар видео навор дида мешавад, ки чӣ тавр ҳазорҳо нафар барои як намоиши фароғатӣ дар Tashkent City ҷамъ омадаанд. Албатта, дар консерт масофаи иҷтимоиро касе риоя намекард. Анбӯҳи одамон то ними шаб шодӣ карда, суруд хонда, рақс мекарданд.
Гузашта аз ин, тавре ки нозирон қайд мекунанд, чунин консертҳо дар Тошканд ҳафтае чанд маротиба баргузор мешаванд ва ҳеҷ гуна маҳдудияти эпидемиологӣ ба чунин чорабиниҳо халал намерасонад.
Табиист, ки ин гуна беадолатӣ дар амали мақомот мавҷи хашму ғазабро дар шабакаҳои иҷтимоӣ ба вуҷуд овардааст. Мардум намефаҳманд, ки чаро намоз ба саломатии одамон таҳдид мекунад, аммо консерт таҳдид намекунад.
Ёдрас мекунем, ки қаблан Шӯрои уламои Раёсати мусулмонони Ӯзбекистон дар бораи лағви намози дастаҷамъӣ ба ифтихори Иди Қурбон қарор қабул карда буд. Шӯрои уламо қарори худро бо вазъи эпидемиологии кишвар асоснок кард. Тибқи ҳамин қарор, намози ҷаноза низ фармон дода шудааст, ки дар манзили зист бо иштироки хешовандони наздик гузошта шавад. Инчунин адои намози ҷумъа муваққатан боздошта шудааст.
Дар бахши ӯзбекии шабакаҳои иҷтимоӣ корбарон ба чунин беадолатӣ розӣ нестанд. Масалан, собиқ имомхатиби масҷиди «Омина» -и шаҳри Тошканд Фазлиддин Парпиев дар Фейсбук вазъро чунин шарҳ дод. «Дар ин кишвар манфиатҳои мусулмонон ҳатто 1% ҳам эътироф карда намешаванд. Сабаби онро ҳар кас хуб медонад — мусулмонон дар ин ҷо «қадру қиммат» надоранд, арзишҳо, дин, эътиқод ва хоҳишҳои онҳо барои касе аҳамияте надорад … Ҳама инро мефаҳманд, аммо касе ҷуръат намекунад, ки иқрор шавад. Барои ҳукумат муҳим нест, ки шумо асабонӣ мешавед ё ғамгин ҳастед, зеро шумо худро ҳамин тавр муаррифи кардаед ва бо дигарон низ ҳамин тавр муносибат мекунед”, навиштааст ӯ.
