Рейдҳо дар Туркманистон
Кормандони Вазорати амнияти миллии Туркманистон дар минтақаи Лебап рейдҳо анҷом дода, тамоми адабиётҳои исломиро аз сокинон мусодира мекунанд. Тавре рӯзи 22 июл Радиои Азаттык хабар дод, рейдҳо дар чанд шаҳри ин вилоят ҷараён дорад.
Дар гузориш гуфта мешавад, ки Раёсати ВАМ дар вилояти Лебап ба манзилҳои сокиноне, ки ба масҷид мераванд, рейдҳои густарда ташкил кардаанд. Тамоми адабиётҳои исломӣ, ба истиснои Қуръон, ҳатто он адабиётҳои диние, ки ба истилоҳ ба «меъёрҳои Туркманистон ҳамчун адабиёти динӣ» ҷавобгӯ мебошад мусодира карда мешаванд. Пас аз шунидан оиди кофтуковҳо сокинони минтақаҳои дигар низ адабиётҳои доштаашонро пинҳон карданд.
Қобили зикр аст, ки рейдҳо аз рӯзи аввали иди Қурбон оғоз шудаанд. Ба таври расмӣ, рейдҳо бо он далел асоснок карда мешаванд, ки гӯё дар заминаи таҳаввулоти рӯйдодҳо дар ҳамсоякишвари Афғонистон, гӯё тарафдорони Толибон ва воизони ДАИШ дар кишвар фаъолтар шудаанд.
Як сокини солхӯрдаи кишвар ба шарти ифшо нашудани номаш ба хабарнигор изҳор намуд, ки миқёси рейдҳои мазкур ки ба таъқиби диндорон вобастагӣ дорад ба таъқибҳои замони Шӯравӣ шабоҳат дорад.
«Кормандони амнияти миллӣ, бо пайдо кардани китоби динӣ, ҳатто агар он ба меъёрҳои адабиёти динии Туркманистон ҷавобгӯ бошад ҳам, ба бозпурсии шаҳрвандон шурӯъ мекунанд. Кор то ҷое расидааст, ки мусулмононро ба нӯшидани машруботи спиртдор маҷбур мекунанд», — гуфт ӯ.
Ҷолиби диққат аст, ки чунин рейдҳо дар Туркманистон мунтазам гузаронида мешаванд. Масалан, тирамоҳи соли 2019 нерӯҳои амниятии шаҳри Мари касонеро, ки ба масҷид мераванд, барои бозпурсӣ даъват карда, ба онҳо фишор мегузаронданд, то дар байни мусулмонони мушоҳид маълумот ҷамъ кунанд. Инчунин зимистони соли 2020, дар вилояти Лебап кормандони бахши давлатиро барои адои намози ҷумъа ба масҷид рафтан манъ карданд. Ҳамчунин дар баҳори соли 2021, тамоми масҷидҳои шаҳри Мари баста шуданд ва ба сокинони шаҳр бидуни тавзеҳ намози идро манъ карданд. Илова бар ин, дар тӯли солҳои зиёд гузоштани намоз дар ҷои кор манъ шудааст.
