Лавров: кишварҳои Осиёи Марказӣ мустамлика нестанд
Сергей Лавров, вазири умури хориҷаи Русия, дар матлаби худ «Русия ва Осиёи Марказӣ: 30 сол дар роҳи дӯстӣ ва ҳамкорӣ», ки дар «Российская газета» нашр шудааст, чанд изҳороти хеле ҷолиберо баён кардааст. «Баръакси баъзе кишварҳои ғарбӣ, Русия минтақаи Осиёи Марказиро майдони бархӯрди геополитикӣ дар рӯҳияи консепсияи мустамликавии «бозии бузург» намеҳисобад. Дар робита ба ин, мо танҳо аз ҳамгироии афзояндаи дохилиминтақавӣ, мулоқотҳои мунтазами машваратии сарони кишварҳои Осиёи Марказӣ истиқбол мекунем”, — навиштааст ӯ.
Лавров ҳамчунин қайд мекунад, ки гӯё миёни Русия ва кишварҳои Осиёи Марказӣ дӯстӣ вуҷуд дорад, аммо вобастагӣ нест. «Мо наметавонем аз он шод шавем, ки бо тамоми кишварҳои Осиёи Марказӣ муносибатҳои шарикии стратегӣ ва бо аксарияти он иттифоқчи ҳастем. Ҳамкории мо аз иқтисодиёт cap карда то робитаҳои маданию гуманитарӣ ҳамаҷониба аст. Муносибатҳои ҳамоҳанг, баробарҳуқуқ ва мутақобилан судманди мо намунаи равшани он аст, ки ҳамкориҳои байнидавлатӣ дар асри XXl чӣ гуна бояд бунёд карда шаванд. Хоҳиши тарафайн барои тавсеа ва амиқтар кардани ҳамкориҳои мутақобилан ғаникунанда мавҷуд аст”, — гуфт ӯ.
Таҳририяти «Хабарҳо» барои шарҳи ин мавзӯъ ба блогнависи тоҷик Абдулло Аббосов муроҷиат намуд. «Вазири Русия талош дорад бигӯяд, ки Русия бо кишварҳои Осиёи Марказӣ ҳамчун шарикони баробарҳуқуқ муносибат мекунад, ҳарчанд ба ҳама маълум аст, ки ин тавр нест. Воқеан, нуфузи Русия дар минтақа он қадар бузург аст, ки барои кишварҳои дигари мустамликадор дар ин минтақа ҷой нест.
Дар мавриди Чин бошад, миёни Русия ва Чин баъзе тавофуқ вуҷуд дорад, ки Чин дар минтақа танҳо бо як бахши иқтисодӣ маҳдуд хоҳад шуд, дар ҳоле ки Русия дар бахшҳои низомиву сиёсӣ ва дигар соҳаҳоро назорат хоҳад кард”, — гуфт блогнавис.
