Душанбе: дӯконҳои китобфурӯширо мӯҳр заданд
Дар Душанбе мақомот дӯконҳои китобфурӯшии адабиёти диниро дар назди масҷиди марказии пойтахт мӯҳр задаанд. Яке аз соҳибони чунин дӯкони китоб ба хабарнигорони Озодӣ гуфт, мақомот 3 ҳафта қабл дари дӯконҳои онҳоро мӯҳр зада, ба фурӯши адабиёти динӣ иҷозат намедиҳанд.
Беш аз 10 мағозаи фурӯши адабиёти динӣ аз ҷониби Раёсати иттиҳодияҳои динии Кумитаи дин мӯҳр баста шудааст. Озодӣ бо такя ба як корманди Кумита хабар медиҳад, ки моҳи гузашта бар асоси санҷиши фаъолияти ин дӯконҳо аз ҷониби комиссияи муштарак аз чанд шӯъба, ба дари онҳо мӯҳр зада шуд.
«Ҳоло чанд мавод ва адабиёте, ки дар дӯконҳои китоб мусодира шуда буданд, таҳти омӯзиш қарор дорад, аммо фикр мекунам, ки ин мағозаҳо дубора кушода хоҳанд шуд», — гуфт намояндаи Кумитаи дин.
Бояд гуфт, ки дар Тоҷикистон беш аз даҳ сол аст, ки воридот ва нашри адабиёти динӣ таҳти назорати қатъӣ қарор гирифта, бидуни иҷозаи Кумитаи дин ба ҳеҷ як китоби дорои хусусияти динӣ дар рафҳои дӯконҳои китобфурӯшӣ ҷоӣ дода намешавад.
Яке аз сокинони маҳаллӣ бо номи Абдуҳалим ба таҳририяти «Хабарҳо» гуфт, ин дӯконҳо қариб ягона ҷойест, ки на танҳо барои сокинони пойтахт, балки барои сокинони дигар минтақаҳо низ ҳар навъ адабиёти диниро харидорӣ кардан мумкин аст. Дар ин ҷо, аслан танҳо адабиёти тасдиқкардаи Кумитаи дин метавонист харидорӣ кард, ки баста шудани дӯконҳо аксари сокинони маҳалро ба ҳайрат овард.
«Рӯз аз рӯз ҷониби мақомоти тоҷик барои диндорон дар омӯзиши Ислом монеаҳои бештар эҷод мекунанд, фарзандони мусулмонон наметавонанд дин биомӯзанд, ба масҷид рафтани кӯдакон манъ аст, сокинони кишвар ба фарзандонаш он чиро ки худ медонанд таълим медиҳанд. Акнун дӯконҳои китобфурӯши баста шудааст. Баъд чӣ? Оё хона ба хона гашта, Қуръон, алифбои арабӣ ва адабиёти дигарро мисли замони шӯравӣ мусодира мекунанд?», хашмгин шуда мегӯяд ҳамсӯҳбати «Хабархо» аз пойтахт бо номи Аъзам.
