Афғонистон: устод Ансорӣ кушта шуд

Рӯзи 2 сентябр пас аз намози ҷумъа дар масҷиди Гузаргоҳи вилояти Ҳирот, дар ғарби Афғонистон, Мавлавӣ Муҷиби Раҳмони Ансорӣ, воизи маъруфи исломӣ бар асари як ҳамлаи террористӣ кушта шуд.  Мавъизаҳои ӯ на танҳо дар Афғонистон, балки дар кишварҳои ҳамсояи форсизабон, бахусус дар Тоҷикистон низ маъруф буданд.

Ба гузориши расонаҳо, 5 нафар дар масҷид қурбонии таркиш шудаанд, ки дар миёни кушташудагон бародар Муҷиб низ буд. Писари воизи исломӣ захмӣ шудааст.

Мавлавӣ Муҷиби Раҳмони Ансорӣ бо мавқеи оштинопазири худ оиди зарурати зиндагии исломӣ ва давлати исломӣ дар кишвар маъруфият дошт, ба гуфтаи коршиносон, ӯ аз ҷанги байниҳамдигарии паштунҳо ва тоҷикон дар Афғонистон омили муҳими ҷилавгирӣ гардидааст.

Муҷиби Раҳмони Ансорӣ низ борҳо дар мавъизаҳояш режими Тоҷикистонро барои сиёсати зиддиисломияш танқид мекард.

Қобили зикр аст, ки тайи чанд моҳи охир дар Афғонистон дар ҳамин гуна шароит чанд нафар аз уламои бонуфузи исломӣ кушта шуданд, аз ҷумла: устод Раҳимуллоҳ Ҳаққонӣ, шайх Сардор Валӣ Соҳиб, Мавлавӣ Амир Муҳаммади Кобулӣ, Шайх Абӯаҳмад Салафӣ ва дигарон.

Нозирон қайд мекунанд, ки амалияи қатли уламо ва воизоне, ки бо мавқеи оштинопазири исломии худ маъруф буданд, пеш аз ба қудрат омадани Толибон шурӯъ шуда буд.  Чунин падидаҳо дар Сурия дар авҷи инқилоб дар ин кишвар низ ба вуқӯъ пайваст: пешвоёни бонуфузи инқилобӣ, ки ба истиқрори Ислом дар ин кишвар даъват мекарданд, маҳз бо чунин услуб аз байн бурда шуданд.

Қобили зикр аст, ки нуфузи хадамоти махсуси Ғарб дар Афғонистон то андозае боқӣ мондааст ва ҳоло барои эҷоди бесарусомонӣ дар кишвар тавассути амалҳои террористӣ бо теъдоди зиёди қурбониён истифода мешавад.