Ӯзбекистон: бе барқ ва газ
Раиси шаҳри Тошканд Ҷаҳонгир Ортиқхоҷаев аз мақомаш озод шуд. Илова бар ин, муовини вазири энергетика Шерзод Хоҷаев ва сардори «Нерӯгоҳҳои ҳароратӣ» Фарҳод Абдураҳмонов аз мақомҳояшон барканор шуданд. Субҳи 16 январ, раисҷумҳури Узбакистон Шавкат Мирзиёев ба масъалаи таъмини аҳолӣ бо захираҳои энержии бефосила ҷаласа баргузор кард.
Гуфта мешавад, ки тасмим дар бораи истеъфои мансабдорон дар робита ба камбудиҳои ҷиддии дар ҷараёни омодагӣ ба мавсими зимистон гирифта шудааст. Иҷрокунандаи вазифаи раиси шаҳри Тошканд муовини аввали раиси шаҳр Бахтиёр Раҳмонов таъин мешавад. Муовини додситони кулл Эркин Юлдашев додситони пойтахт таъин шуд.
Ёдовар мешавем, ки бо фарорасии сармо дар авоили моҳи январ сокинони Узбакистон аз қатъи пайвастаи интиқоли газ ва нерӯи барқ изҳори норозигӣ карданд ва қатъи он ба пойтахти кишвар низ асар гузошт.
Нозирон қайд мекунанд, ки тасмими популистӣ дар бораи барканории Ортиқхоҷаев ба хотири коҳиши авзоъ ва ором кардани сокинони пойтахт гирифта шудааст. Вале мардуми Узбекистон ба ин қарор бо руҳбаландии зиёд вокуниш нишон надоданд. Шарҳҳо дар шабакаҳои иҷтимоӣ нишон медиҳанд, ки бо барканории мансабдорон чизе тағйир наёфтааст: то ҳол дар хонаҳои онҳо газу барқ нест.
