Боз як пойгоҳи низомии хориҷӣ дар Тоҷикистон
Тоҷикистон иттилоотро дар бораи сохтмони пойгоҳи низомӣ бо иштироки Чин боз якбори дигар рад кард. Ҳамин тавр, 8 август дар як нишасти матбуотӣ дар Душанбе муовини аввали вазири корҳои дохилии кишвар Абдураҳмон Аламшозода изҳор дошт, ки ҳеҷ кас дар ноҳияи Ишкошими ВМКБ пойгоҳи низомӣ намесозад. «Дар бораи маълумоте, ки гӯё Чин як пойгоҳе месозад, ин комилан беасос аст. Ҳеҷ гуна пойгоҳ ва ҳеҷ гуна марказе дар ноҳияи Ишкошим ва умуман дар ВМКБ мо намесозем», — гуфт ӯ.
Қаблан, 12 июл, Вазорати корҳои хориҷии Тоҷикистон низ хабарҳоро дар бораи мавҷудияти пойгоҳи махфии низомии Чин дар ҳудуди кишвар рад карда, дар сомонаи расмии худ матни онро нашр намуд. «Дар робита ба хабарҳои баъзе расонаҳо, ки гӯё Чин дар ҳудуди Тоҷикистон пойгоҳи низомӣ таъсис додааст, хабар медиҳем, ки онҳо беасосанд. Ин масъала ҳеҷ гоҳ дар рӯзномаи музокироти Тоҷикистону Чин набуд ва нест», — гуфта мешавад дар хабар.
Намояндаи Вазорати корҳои хориҷии Чин Линь Тзян низ дар навбати худ ин маълумотро рад кард. «Ман дар бораи вазъияте, ки шумо зикр кардед, хабар надорам, аммо метавонам бо итминон бигӯям, ки Чин ҳамеша сиёсати мустақилона ва сулҳомези хориҷиро пеш мебарад ва дар Осиёи Марказӣ ҳеҷ пойгоҳи низомӣ надорад», — изҳор дошт ӯ.
Ёдрас мекунем, ки аввалин бор маълумот дар бораи мавҷудияти пойгоҳи низомии Чин дар ҳудуди Тоҷикистон дар моҳи феврали соли 2019 аз ҷониби нашрияи амрикоии Washington Post нашр шуда буд. Хабарнигори таҳқиқотии ин нашрия Герри Ших дар мақолае аксҳои низомиёни чиниро, ки дар биноҳои пойгоҳи эҳтимолӣ ва тасвирҳои моҳвораӣ ҷойгир буданд, нашр карда, ҳамчунин бо низомиёни чиние, ки дар пойгоҳи низомӣ ҷойгир шудаанд, мусоҳиба анҷом додааст. “Тибқи мусоҳибаҳо, таҳлили тасвирҳои моҳвораӣ ва аксҳо, инчунин мушоҳидаҳои шахсии хабарнигори Washington Post, нерӯҳои чинии ба ин маҳал, ки дар Тоҷикистон дар канори сарҳади ғарбии Чин ҷойгир аст, дар тӯли ҳадди ақал се сол оромона назорат мекарданд”, — омадааст дар мақола. Дар ҷараёни сафари ахири худ дар сарҳади Тоҷикистон ва Афғонистон, хабарнигор яке аз маҷмааҳои низомиро мушоҳида намуда, бо гурӯҳи сарбозони чинӣ дар либоси низомӣ рӯбарӯ шуд, ки дар бозори шаҳр, наздиктарин бозор ба пойгоҳашон аст, харид мекарданд. Онҳо нишонаҳои фарқкунандаи воҳид аз Вилояти мухтори Шинҷон-Уйғурро дар гарданбандҳои худ доштанд, ки дар онҷо ҳукумати Чин тақрибан 1 миллион уйғурро — аҳолии аслии мусалмони Туркистони Шарқиро боздошт кардааст.
