Муҳоҷирони меҳнатӣ дар Русия: афзоиши нафрат
Муҳоҷирони меҳнатӣ аз Осиёи Марказӣ дар Русия бо сатҳи тамоман нави фишор аз ҷониби мақомот рӯбарӯ шудаанд — рад кардани вуруд, депортатсия, боздоштҳои гурӯҳӣ бо таҳқир ва изҳороти беасоси зиддимуҳоҷирӣ аз ҷониби сиёсатмадорони сатҳи федералӣ ба таври назаррас афзоиш ёфтааст. Танҳо тибқи иттилои расмии мақомоти Русия, шумораи депортатсияҳо нисбат ба соли 2024 бист дарсад зиёд шудааст.
Гурӯҳи муҳоҷирон аз Тоҷикистон аллакай чанд ҳафта боз дар фурудгоҳи Жуковскии Москва дар шароити ғайриинсонӣ нигоҳ дошта мешаванд. Дар наворе, ки муҳоҷирон ба Радиои Озодӣ фиристодаанд, даҳҳо мард дар як ҳуҷрае бо катҳои оҳанин маҳкам шудаанд; дар он утоқ на тиреза асту на кондитсионер. Баъзеҳо мустақиман рӯи фарши бетонӣ хобидаанд, баъзеи дигар ҳатто ҷойи нишастан намеёбанд. «Ман даҳ рӯз аст, ки дар инҷоям. Рӯзе як бор танҳо лапшаи зудпухт медиҳанд, ва дигар чизе не», — мегӯяд яке аз онҳо. Ӯ илова мекунад, ки дар он утоқ тақрибан 75 нафар ҷой дода шудаанд. «Дар байни мо шахсе ҳаст, ки аз бемории дил ранҷ мекашад», — мегӯяд дигар боздоштшуда. «Мо ба мақомоти русия гуфтем, ки мехоҳем билет харем ва ба Тоҷикистон баргардем, вале моро инҷо нигоҳ дошта, намемонанд, ки баргардем», — нақл мекунад як марди дигар. Шаҳрвандони Тоҷикистон пас аз содир кардани қарори додгоҳҳои Русия дар бораи депортатсияи онҳо ба фурудгоҳ оварда шуданд. Аммо мақомоти Русия сабаби нигоҳ доштани муҳоҷиронро дар фурудгоҳ шарҳ намедиҳанд.
Як зани қирғиз ба «Мигрант медиа» нақл кард, ки 1 август кормандони полис ӯро зиёда аз 24 соат дар як ҳуҷраи серодам дар фурудгоҳи Жуковский нигоҳ дошта таҳқир карданд. Ин зан, ки нахост номаш ошкор шавад, мегӯяд, ӯро ва чанд мусофири дигар аз фурудгоҳи шаҳри Ош пас аз фуруд омаданашон дар Москва ба бозпурсӣ бурданд. Зане, ки ҳиҷоб дошт, нақл кард, ки полис ӯро пурсидаанд, чаро ҳиҷоб мепӯшад, ва кӯшиш карданд ӯро ба пайгирии наворҳои ифротӣ дар телефонаш айбдор кунанд. «Моро дар утоқи бе тиреза ва бидуни ҳаво маҳкам карданд. Дар дохил чанд катҳои оҳанин буд. Танҳо бо “Ролтон”-и мӯҳлатгузашта ғизо медоданд. Як духтар табъаш бад шуд, мо дарро кӯфтем. Вақте корманд дарро кушод, хоҳиш кардем, ки “Ёрии таъҷилӣ” даъват кунад. Ӯ шахси дигареро дар либоси низомӣ бо электрошокер даъват намуд», — гуфт ӯ.
Ба гуфтаи шоҳидон, муҳоҷирон пас аз расидан ба Русия бо тафтишоти бесобиқа рӯбарӯ мешаванд — ҳатто маҷбур мешаванд, ки ба саволҳо дар бораи тамосҳои телефонӣ ҷавоб диҳанд, телефонҳояшонро мусодира карда, бо диққат месанҷанд, асосан барои маводи динӣ дар ҳар шакл. Ҳамчунин шабакаҳои иҷтимоии онҳо низ тафтиш карда мешаванд.
Бо дарназардошти он ки ҳамаи ин амалҳо аз тариқи шабакаҳои телевизионии федералӣ ва каналҳои таблиғотии Telegram васеъ инъикос меёбанд, табиист, ки дар натиҷа сатҳи нафрат дар ҷомеа ба ҳадде расидааст, ки мардуми рус ошкоро дар кӯчаҳои шаҳрҳои худ ба муҳоҷирони меҳнатӣ ҳамла мекунанд. Илова бар ин, ҳамлаҳои доимии гурӯҳҳои миллатгаро чун “Ҷамъияти русӣ” низ зиёд шудаанд.
Сарфи назар аз он ки вазъият ҳар рӯз шиддат мегирад — ҳукуматҳои кишварҳои Осиёи Марказӣ, мисли ҳамеша, ҷуз баёнияҳои расмии «изҳори нигаронӣ» барои ҳимояи ҳуқуқ ва шарафи шаҳрвандони худ ягон иқдоми ҷиддие намеандешанд.
