Дар Тоҷикистон рӯзноманигор ба 1 соли зиндон маҳкум шуд
Додгоҳи ноҳияи Шоҳмансури шаҳри Душанбе рӯзноманигор Далер Шариповро ба як соли зиндон дар колонияи низомаш умумӣ маҳкум кард. Дар ин хусус Азия-Плюс бо истинод ба адвокати рӯзноманигор Абдуманон Шарифов хабар дод.
Додгоҳ Далер Шариповро мутобиқи моддаи 189 Кодекси ҷиноии Ҷумҳурии Тоҷикистон (барангехтани кинаву адовати миллӣ, нажодӣ, маҳаллӣ ё мазҳабӣ) айбдор донист. Падари Далер аз ҳукми эълоншуда изҳори норозигӣ кард: «Мо умедвор будем, ки Далер имрӯз аз толори суд озод мешавад ва ба назди хонаводааш бармегардад. Аммо, мутаассифона, ин тавр нашуд».
Ёдрас мекунем, ки рӯзноманигор Далер Шарипов рӯзи 28-уми январ аз ҷониби мақомоти ҳифзи ҳуқуқ бо иттиҳоми «экстремизм» боздошт гардид. Бояд қайд кард, ки тибқи гузориши ташкилоти «Адолат барои рӯзноманигорон», Тоҷикистон дар таъқиби хабарнигорон бинобар фаъолияти касбияшон дар минтақа пешсаф мебошад. «Намуди асосии ҳамла ба кормандони ВАО дар Тоҷикистон ин ҳамлаҳо бо истифодаи механизмҳои ҳуқуқӣ ва ё иқтисодӣ, пеш аз ҳама айбдоркунӣ дар экстремизм, робита бо террористон, таъқиби ҷиноятӣ ва ҳабси кормандони ВАО мебошад. Аз соли 2017 то 2019 шумораи ҳамлаҳои ошкоршуда аз ҷониби шахсони мансабдори давлатӣ, инчунин таҳдидҳои табиати ғайримуҷоз ва ё киберфазо ба ҳисоби миёна 3 маротиба зиёд шудааст. Хабарнигороне, ки мақолаҳои танқидӣ менависанд, ба таҳдид ва таъқиб дучор мешаванд ва дар ҷиноятҳои гуногун айбдор карда мешаванд», гуфта шудааст дар маърӯза.
