Муҳоҷирони меҳнатӣ: ба Русия бидуни оила

9-уми сентябр вакилони фраксияи «Русияи одилона — Барои ҳақиқат» бо сарварии Сергей Миронов ба Думаи давлатӣ тарҳи қонунеро пешниҳод карданд, ки ба муҳоҷирони меҳнатӣ бо худ ба Русия бо аъзои оилаашон омаданашон манъ карда шавад. Истисно танҳо барои шаҳрвандони Беларус ва мутахассисони хориҷии баландихтисос гузошта шудааст.

Ба андешаи вакилон, ҳузури оилаҳои муҳоҷирони меҳнатӣ дар кишвар боиси сарбории ҷиддӣ ба инфрасохтори иҷтимоии давлат мегардад, аз ҷумла ба муассисаҳои таълимӣ ва низоми тандурустӣ. «Дар айни замон, даромадҳои буҷет аз ҳисоби патентҳои муҳоҷирон хароҷоти нигоҳдории аъзои бекори оиларо ҷуброн намекунад, ки чунин модели сиёсати муҳоҷиратиро аз ҷиҳати иқтисодӣ номуфид месозад», — гуфта мешавад дар шарҳи тавзеҳии ҳуҷҷат. Бо назардошти равандҳои кунунии Русия, шубҳае нест, ки ин қонун қабул хоҳад шуд.

Вале бисёре аз иқтисоддонҳо иддаоро, ки гӯё оилаҳои муҳоҷирон танҳо сарборӣ меоранд, рад мекунанд. Масалан, дотсенти Донишгоҳи федералии вилояти Урал Виктория Коретская-Гармаш дар кори илмии худ таҳти унвони “Истифода аз меҳнати муҳоҷирон — таҳдид ё бартарӣ барои рушди иқтисоди Русия” исбот кардааст, ки муҳоҷирати меҳнатӣ манфиатҳои зиёдеро низ меорад: муҳоҷирони меҳнатӣ бо оилаҳои худ кӯчида, тавассути пардохти андоз ва истеъмол саҳми назаррас ба иқтисоди Русия мегузоранд. Инчунин иқтисоддонҳои воҳидҳои Шарқи Дури Бонки Марказии Русия Мария Кудаева ва Иван Редозубов низ ба чунин хулоса расидаанд: ба андешаи онҳо муҳоҷирон умуман ба фаъолиятҳои иқтисодӣ ва ММД таъсири мусбат мерасонанд. Умуман, бо дарназардошти хориҷ шудани миллионҳо шаҳрвандони қобили меҳнат аз иқтисод дар натиҷаи талафоти ҷангӣ ва релокатсия, бидуни муҳоҷирони меҳнатӣ иқтисоди Русия ба вазъияти бисёр душвор рӯ ба рӯ хоҳад шуд.

Аён аст, ки тамоми ин маърака на ба хотири ангезаҳои иқтисодӣ, балки ба хотири сиёсӣ роҳандозӣ шудааст. Зеро имрӯз дар Русия дар шароити ҷанг зарур аст, ки кайфияти миллӣ-ватанпарастӣ ҳифз карда шавад ва муҳоҷирони меҳнатӣ ҳамчун “зоғи сиёҳ” барои он интихоб шудаанд. Ҳамин тавр, ҳатто ба зиёни иқтисоди худ Кремл муҳоҷирони меҳнатиро ҳадафи таънаву таҳқир қарор медиҳад, то рӯҳияи ҷангии аҳолии худро боло нигоҳ дорад. Мансабдороне, ки бевосита масъули иқтисоди кишвар ҳастанд, ночор хеле боэҳтиёт эътирози худро нисбат ба ин нафратҳои зидди муҳоҷиратӣ баён мекунанд. Дар натиҷа, ҳар як ташаббуси нави қонунгузорӣ ва ҳар як изҳороти навбатии сиёсатмадорон дар бораи муҳоҷирони меҳнатӣ рекорди сафсатагӯиро мешикананд.

Масалан, яке аз охирин изҳороти идеологи асосии “ҷаҳони рус” Александр Дугин ҳамаро ба ҳайрат овард. Ба андешаи ӯ ҳамаи муҳоҷирони меҳнатӣ аз Осиёи Марказӣ бояд дини насрониро қабул кунанд ва «рус» шаванд, то дар Русия бимонанд. «Тоҷики православ, озарбойҷонӣ, ӯзбек, ки барои Русия меҷангад, дигар муҳоҷир нест, балки рус аст. Ва касе ки намеҷангад, бигзор аз кишвар берун шавад», — навиштааст файласуф. Ба занони мусалмон бошад, ӯ «иҷозат» додааст, ки рӯсарии худро бадар накунанд, ба шарте ки рамзи Z-ро гузоранд: «Бигзор рамзи Z-ро ба рӯсарӣ гузоранд. Медонем, ки ин бонувони шарафманд ба шабакаи рус манфиатоваранд».