Дар Душанбе 70 нафар зиёраткунандагони ҳаҷро аз хатсайр боздоштанд
Тақрибан 70 нафар мизоҷони ширкати ҳавопаймоии «Сомон Эйр» ва «Fly Dubai» дар фурудгоҳи шаҳри Душанбе аз хатсайр боздошт гардиданд, дар ин хусус сомонаи «Ахбор» иттило медиҳад. Дар рафти гузаронидани рейди муштарак аз тарафи КДАМ, Кумитаи оид ба корҳои дин ва прокуратураи нақлиётӣ дар фурудгоҳи шаҳри Душанбе дар рафти тафтишоти мизоҷони се хатсайри Душанбе — Дубайи ширкати ҳавопаймоии «Сомон Эйр» ва «Fly Dubai», тақрибан 70 нафар мизоҷон аз хатсайрҳои мазкур боздошт шуданд.
Сабаби боздошти мизоҷон аз хатсайр, раводидҳои Саудӣ доштани онҳо барои адо намудани ҳаҷи хурд (умра) гардидааст, ки бо воситаи миёнаравон дар режими онлайн ба қайд дароварда шудааст. Дар Тоҷикистон литсензия барои рафтани ҳаҷи хурд (умра) танҳо ду ширкат — «Расул Сохтмон» ва «Ормон» соҳиб мебошанд.
Рафта омадани сокинони Тоҷикистон ба ҳаҷи хурд (умра) бо ширкати «Расул Сохтмон» ба маблағи $2100 мумкин аст, бо ширкати «Ормон» бошад, $2000 ро ташкил мекунад. Вале, миёнаравон барои хизмати худ маблағи паст мегирифтанд, зимнан сифати баланди хизматрасониро пешниҳод менамуданд, — иттило медиҳад ба манбаи худ такя намуда сомонаи «Ахбор».
