Дар Москва тоҷикон ҳангоми нашри варақаҳо алайҳи Макрон боздошт шуданд
Мақомоти ҳифзи ҳуқуқ дар шаҳри Москва ду муҳоҷири тоҷикро боздошт карданд, ки дар метрои Москва бо часпондани варақаҳо бо карикатураи президенти Фаронса машғул буданд.
Дар ин бора рӯзи 3-ми ноябр ОФИ (Оҷонсии Федералии Иттилоот) бо истинод ба як манба дар ҳифзи ҳуқуқ хабар дод.
Тибқи маълумотҳои дастрас, ҷавонон расми Эммануэл Макронро дар қатораҳои метро бо навиштаҷоти «Террористи рақами 1 дар ҷаҳон» мечаспонданд. Ҷавононро дар платформаи истгоҳи Третяковская боздошт намуданд.
Аз ҷавонони боздоштшуда варақаҳо мусодира карда шуд ва нисбати онҳо парвандаи маъмурӣ тартиб дода шуд. Онҳо дар бораи амалҳои худ баёнотҳои хаттӣ навиштаанд, менависад манбаъи интернет.
Ёдрас мекунем, ки рӯзҳои 30 ва 31 октябр дар назди сафорати Фаронса дар Москва гирдиҳамоиҳои эътирозӣ алайҳи президенти Фаронса ва сиёсати ӯ нисбати мусулмонон баргузор гардид, наворҳои дахлдор дар шабакаҳои иҷтимоӣ ва расонаҳои гуногун нашр шуданд. Тавре ки дар видеонавори нашршуда дида мешавад, дар байни тазоҳургарон муҳоҷирон аз кишварҳои Осиёи Миёна низ иштирок доштанд. Инчунин рӯзи 1-уми ноябр дар шаҳри Кёлни Олмон, тоҷикон ба гирдиҳамоӣ барои дифои шаъни Паёмбар Муҳаммад (саллаллоҳу алайҳи ва саллам) баромаданд ва сиёсати президенти Фаронсаро маҳкум карданд.
Қобили зикр аст, ки мавқеъ ва изҳороти президент Макрон нисбати карикатураҳое, ки шаъну шарафи паёмбар Муҳаммадро бадном мекунад, боиси хашм ва ғазаби мусулмонон гаштааст, дар саросари ҷаҳон эътирозҳо бо ҳамроҳии сӯзондани парчами Фаронса ва суратҳои Макрон, инчунин даъват ба бойкоти молҳои Фаронса идома дорад.
