Оилаи қотил ба падари духтараки кушташудаи тоҷик фишор меорад

Абдусалом Саидов падари Ҳувайдои 5 сола ки аз тарафи сокини маҳаллӣ дар шаҳри Серпухови ФР ба қатл расид дар наздикӣ аз Маскав баргашт. Чи тавре ки centralasian.org менависад, падари Ҳувайдо мегӯяд то саршавии ҷараёни судӣ оид ба қатли духтараш дар Тоҷикистон хоҳад монд.

Абдусалом Саидов моҳи августи соли ҷорӣ ба шаҳри Маскав парвоз намуд, то ин ки ҳамроҳи ҳимоячӣ барои ҷараёни судӣ тайёри бинанд. Вале, оилаи Александр Сёмин қотили Ҳувайдо ба Абдусалом фишор оварданро сар кард.

«Онҳо барои аз даъвои худ баргаштанам ба ман ду маротиба ҷубронпулӣ, аввал — 6 миллион, сипас — 10 миллион рубли русӣ таклиф намуданд. Ман рад кардам. Қалби ман ҳеҷгоҳ қотили духтарамро намебахшад… Пас аз ин оилаи Сёмин аз болоям шикоят намуд, гӯё ман онҳоро таҳдид намудам. Онгоҳ ҳимоячии оилаамон ба ман маслиҳат дод, то саршавии ҷараёни судӣ дар Тоҷикистон бимонам», мегӯяд Абдусалом.

Ба гуфтаи ӯ ҷараёни судӣ оиди қатли Ҳувайдои 5 сола санаи 22-уми декабр шурӯъ хоҳад шуд.

Дар моҳи октябр мӯҳлати ба ҳабсгирии гумонбаршуда дар қатли Ҳувайдои 5 сола аз тарафи додгоҳ ба ду моҳ дароз карда шуд. Ҳимоячи ва наздикони Сёмин бинобар касалӣ будани номбурда, талаб намуданд, ки ӯро озод намоянд.

Ёдрас мекунем, ки Ҳувайдои 5 сола санаи 22-уми июл аз назди ҳавлии манзили зисташ дар Серпухов рабуда шуд. Рӯзи дигар ҷасади Ҳувайдо дар борхалтаи варзишӣ дар роҳи оҳани завод ёфт гардид. Ташхиси экспертизаи тиббӣ нишон дод, ки аввал духтаракро таҷовуз карда, сипас бо корд ваҳшиёна ба қатл расонданд. Бо гумони айбдор будан дар ҷинояти мазкур сокини маҳаллӣ Александр Сёминро ба ҳабс гирифтанд.