Пандемия 2020: шумораи муҳоҷирон дар Русия ду баробар коҳиш ёфт
Дар соли 2020, бинобар пандемияи коронавирус, шумораи муҳоҷирон дар Русия тақрибан ду маротиба коҳиш ёфт. Дар ин хусус РИА Новости бо истинод ба ВКД хабар медиҳад. Ҳоло дар кишвар 6,3 миллион муҳоҷир боқӣ мондаанд, дар ҳоле ки одатан ин шумора аз 9 то 11 миллион нафарро ташкил медод. Айни замон 1,3 миллион шаҳрвандони хориҷӣ соҳиби патент ҳастанд, соли гузашта ин нишондод 1,7 миллионро ташкил дода буд. Бо сабаби пандемияи коронавирус, мақомот вуруд ба кишварро маҳдуд карданд ва бисёре аз лоиҳаҳои сохтмонӣ дар Русия мутаваққиф шуданд.
Ҳукумат чунин мешуморад, ки дар натиҷаи тағиротҳои ҷорӣ, бозори меҳнат аллакай то 1,5 миллион нафар коргарон — асосан муҳоҷирон аз хориҷи наздикро аз даст додааст. Дар робита ба ин, рӯзҳои наздик Вазорати сохтмони Русия ба ҳукумат пешниҳодҳоеро оид ба ташкили вуруди соддакардашуда ба муҳоҷирони меҳнатӣ ба кор дар сохтмонҳо тақдим намуд. Тибқи маълумоти Вазорати сохтмон, дар сектори сохтмон норасоии тақрибан 190 ҳазор нафар коргарон мушоҳида мешавад. Қаблан Вазорати корҳои дохилии Русия хабар дода буд, ки шумораи муҳоҷирони меҳнатӣ дар Русия нисбат ба моҳи сентябри соли гузашта чоряк коҳиш ёфта, тақрибан 1,8 миллион нафарро ташкил додааст. Тибқи иттилои Маркази тадқиқоти стратегӣ, хуруҷи муҳоҷирон аз Русия бо сабаби эпидемияи коронавирус боиси норасоии нерӯи корӣ дар 40% ширкатҳо намоён шудааст. Дар ояндаи наздик, 15% ширкатҳо метавонанд ба зарурати зуд ҷалб кардани кадрҳои нав дучор оянд, зеро талабот ба кормандон афзудааст. Раиси шаҳри Москва Сергей Собянин сатҳи хуруҷи муҳоҷирон аз пойтахти Русияро дар соли 2020 40% арзёбӣ кард. «Мушкилоте намоён аст, ки дар шаҳри Москва муҳоҷирон хеле кам шудаанд. Мувофиқи баъзе ҳисоботҳо он 40%-ро ташкил медиҳад», — қайд кард Собянин.
Коршиносон бар ин назаранд, ки пандемияи ҷаҳонӣ Русияро аз кузури асосӣ дар муносибат бо Осиёи Марказӣ, яъне муҳоҷирати меҳнатӣ маҳрум мекунад, зеро бозори меҳнатии Русия аҳамияти худро дар байни муҳоҷирони меҳнатии ин минтақа аз даст медиҳад.
