Боздошти нав дар Ваҳдат барои ташкили мадраса дар хона
Вазорати корҳои дохилии Тоҷикистон аз боздошти навбатии сокини шаҳри Ваҳдат бо иттиҳоми ташкили мадраса дар хона хабар дод.
Бино ба иттилоъи маркази матбуотии ВКД, бо гумони ташкили мадраса, сокини 48-солаи ҷамоати деҳоти Симиганҷи шаҳри Ваҳдат Абдуалим Ашӯров боздошт шуд.
Тавре ки дар гузориши телевизионие, ки маркази матбуотии ВКД таҳия кардааст, қайд карда мешавад, ки Абдуалим Ашӯров дар хонаи худ мадрасае ташкил кардааст ва ба кӯдакон асосҳои дини Ислом ва хондани Қуръонро таълим медод.
Ёдрас мекунем, ки мақомоти Тоҷикистон чанде қабл дар шаҳри Ваҳдат як сокини маҳаллиро боздошт карда буданд, ки ба кӯдакон ва наврасон асосҳои дини Исломро таълим медод.
Бояд зикр кард, ки дар давраи ҳукмронии режими Раҳмон бо баҳонаи мубориза бо терроризм комилан тамоми мадрасаҳои кишварро барҳам дод, илова бар ин, тақрибан 2 ҳазор масҷид ки бо пули аҳолӣ дар давраҳои мухталиф бунёд шуда буд баста шудаанд.
«Пайдоиши мадрасаҳои пинҳонӣ натиҷаи табии сиёсати ҳукумат дар робита бо таълими дини Ислом мебошад. Талабот ба омӯзиши Ислом бениҳоят баланд аст ва воқеан мактабҳои ғайриқонунӣ, ки кормандони мақомоти ҳифзи ҳуқуқ бастаанд хеле зиёданд», — мегӯяд сиёсатшиноси тоҷик Абдумалик Қодиров.
Ҳамзамон, Кумитаи оид ба корҳои дини кишвар зарурати ифтитоҳи мадрасаро рад мекунад. Тибқи гуфтаи кумита, аҳолӣ ба мадраса ниёз надорад.
