Раҳмон писарашро бо ордени «зарринтоҷ» мукофот намуд
Тибқи иттилои хадамоти матбуотии раисҷумҳур, дар арафаи ҷашни 27 солагии истиқлолияти ҷумҳурӣ Эмомалӣ Раҳмон якчанд кормандони соҳаҳои гуногунро бо инъоми давлатӣ мукофот намуд.
Дар хабар гуфта шудааст, ки бо фармони раисҷумҳур барои фаъолият дар хадамоти иҷроияи ҳокимият бо ордени «зарринтоҷ», дараҷаи дуюм раиси шаҳри Душанбе Рустами Эмомалӣ мукофот намуда шуд.
Тибқи иттилои хадамоти матбуотӣ, бо ордени «Зарринтоҷ» ходимони давлатию ҷамъиятӣ барои хизматҳои бузург дар назди давлат, фаъолияти босамари давлатӣ ва ҷамъиятию сиёсӣ, барои комёбиҳои шоистаи дар ҳаёт татбиқ намудани тағйиротҳои демократӣ ва ислоҳоти иқтисодӣ, тараққиёти илм ва фарҳанг, барои хизматҳои махсус дар ҳифзи Ватан, барои фидокорӣ ва шуҷоати шаҳрвандӣ, ки дар кори истиқрори сулҳ, устуворӣ ва таҳкими давлатдории тоҷикон зоҳир шудаанд, сарфароз гардонида мешаванд. Дар хусуси чи гуна «хизматҳои бузург ва комёбиҳо» -и писари 30 солаи раисҷумҳур дар хабари хадамоти матбуотӣ шарҳ дода нашудааст.
