ВКД-и Русия талаб дорад ҳамаи муҳоҷирони ғайриқонунӣ аз кишвар хориҷ карда шаванд
Вазорати корҳои дохилии Русия аз мақомоти кишварҳои пасошӯравӣ талаб кард шаҳрвандони худро, ки дар Русия дар ҳолати ғайриқонунӣ қарор доранд, то 15 июн берун аз кишвар намоянд. Дар ин бора дар ҷаласаи Ассамблеяи байнипарлумонии ИДМ муовини роҳбари Вазорати корҳои дохилии ФР Александр Горовой изҳор дошт, хабар медиҳад РИА Новости.
«Агар мову шумо ин рақамро то 15 июн коҳиш надиҳем, тавре ки фармони президент дар назар дорад, ин ашхос ба хориҷшавӣ ва бо басташавии марзҳо ҷазо хоҳанд гирифт. Мехостам, ки шумо дар минтақаи худ корҳои таблиғотиро тавассути кор бо васоити ахбори омма, блогерҳо анҷом диҳед», — иқтибос меорад гуфтаҳои мансабдори Русияро нашрия.
Аксарияти муҳоҷирони ғайриқонунӣ аз кишвари Ӯзбекистон мебошанд (беш аз 332 ҳазор нафар). Тоҷикистон бо 247 ҳазор нафар дар ҷои дуввум қарор дорад. Пас аз онҳо Украина бо 152 ҳазор нафар, Озарбойҷон 120 ҳазор нафар, Қирғизистон 115 ҳазор нафар, Арманистон 61 ҳазор, Молдова 56 ҳазор ва Қазоқистон 49 ҳазор нафар мебошанд.
Нозирон қайд мекунанд, ки ин муҳоҷирон бевосита аз ҳисоби чораҳои карантинии мақомоти Русия ҳангоми пандемия дар ҳолати ғайриқонунӣ қарор гирифтаанд. Муҳоҷирон бидуни кор ва маблағ барои зиндагӣ монда, патентро пардохт карда натавонистанд, ва инчунин аз сабаби баста шудани марзҳо қаламрави Русияро тарк карда натавонистанд.
