Ӯзбекистон: дар баъзе шаҳрҳо гуфтани азонро аз баландгӯяк боз манъ карданд
Дар масҷидҳои шаҳри Намангони Ӯзбекистон бо воситаи баландгӯяк ба намоз даъват намуданро қатъ карданд, дар ин хусус centralasian.org ба фаъоли динии маҳаллӣ Аббоси Асад такя намуда иттило медиҳад.
Бо фармоиши имом-хатиби вилояти Намангон дар масҷидҳои шаҳр аз баландгӯяк ба намоз даъват намуданро қатъ карданд. 3-4 рӯз шудааст, ки дар шаҳр овози азон садо намедиҳад. Дар наздикӣ ман дар ҷаноза бо яке аз муаззинҳои маҳаллӣ вохӯрда аз ӯ пурсон шудам, ки чаро дар масҷидҳо овози азон садо намедиҳад, оё чунин ҳолат дар тамоми масҷидҳо рӯй додааст. Ба гуфтаи ӯ, чунин ҳолат пас аз шикояти нафаре ба мансабдор оиди садои баланди азон рӯй додааст, — мегӯяд Аббоси Асад.
Инчунин, меҳмонони масҷиди ҷомеи Ғози Муҳаммад-ҳоҷӣ дар шаҳри Намангон низ тасдиқ карданд, ки дар вақти даромадани намоз садои азонро нашунидаанд. Дар навбати худ, намозгузорони масҷид нисбати ҳукумат ки азонро манъ кардааст, норозигии худро изҳор намуданд.
Чи тавре ки бо шарти ниҳонӣ намояндаи Идораи рӯҳонии мусулмонони Ӯзбекистон хабар дод, роҳбарияти ИРМӮ ба масҷидҳо тавсия додааст, ки барои даъват ба намоз аз баландгӯяк истифода набаранд, Зеро, баъзе аз сокинони вилоятҳои Намангон, Фарғона ва Андиҷон, инчунин, аз шаҳри Тошканд гӯё аз овози баланди садои азон шикоят карда бошанд.
Мушоҳидон қайд мекунанд, ки дар асл эҳтимолан шикоятҳои бардурӯғ ин танҳо баҳона ва сафедкуниест барои чораҳои зиддиисломӣ аз тарафи режим мебошад.
