Айбдоркунандаи давлатӣ барои воъизи тоҷик 18 соли ҳукми зиндон талаб намуд
Ба воъизи маъруфи тоҷик Садриддин Муллоев айбдоркунандаи давлатӣ 18 соли ҳукми зиндон талаб намуд. Ҳукумати Тоҷикистон Садриддин Муллоевро ба аъзогӣ дар ҳаракати исломии «Ҷамоати Таблиғ» айбдор донист. Парвандаи ҷиноӣ нисбати мулло Садриддин дар додгоҳи ноҳияи Синои шаҳри Душанбе баргузор мегардад, дар ин хусус иттило медиҳад радиои Озодӣ.
Ёдрас мекунем, ки воъиз пас аз ҳафт моҳ баъд аз баргаштан аз Туркия дастгир шуд. Чи тавре ки пештар наздикони Муллоев хабар дода буданд, санаи 21-уми сентябр ӯро барои сӯҳбат ба прокуратураи генералӣ даъват менамоянд, сипас дастгир мекунанд. «Айбдоркунандаи давлатӣ барои мулло Садриддин 18 соли ҳукми зиндон талаб намуд. Мо бар он ақидаем, ки ҳукм нисбати бародарам бениҳоят сахт аст», иброз намуд бародари Муллоев ба хабарнигорон.
Садриддин Муллоеви 34 сола дар шаҳри Кӯлоб ҳамчун мулло Садриддин маъруф аст ва домоди ходими маъруфи дин мулло Ҳайдари Шарифзода мебошад. Тибқи гуфтаҳои наздикон, соли 2013 Муллоев ба Русия рафта пас аз як сол ба Туркия меравад ва дар онҷо панҷ сол зиндагӣ мекунад. Моҳи феврали соли равон ба ватан бармегардад, пас аз ин мақомоти ҳифзи ҳуқуқ Муллоевро маҷбур мекунанд навори видеоӣ сабт кунад, ки дар он Садриддин аз иштирокии худ дар «Ҷамоати Таблиғ» пушаймон будани худро ошкор изҳор намуда мегӯяд, ки ба ташкилоти мазкур дигар алоқае надорад. Ҳарчанд ӯ чунин гуфта бошад ҳам, вале дар натиҷа ӯро пушти панҷара равон карданд.
