Гумруки Хатлон 13 тонна Қуръонро мусодира намуд
Дар аввали моҳи январ мақомоти гумруки вилояти Хатлон ҳазорҳо нусхаи Қуръонро бо вазни умумии 13 тонна мусодира карданд, хабар медиҳад портали «Бомдод». Дар хабар гуфта мешавад, ки ин китобҳо аз Афғонистон тавассути гузаргоҳи Панҷи поён оварда шуда ва «ба хотири амният» то тасмими Кумитаи дин мусодира шудаанд.
Портал бо истинод ба манобеъи худ ҳамчунин хабар медиҳад, ки Қуръонҳо бар асоси эъломия расман ба Тоҷикистон ворид шуда, пас аз он барои тафтиши муҳтавои онҳо ва хулосаи мақомоти салоҳиятдор муваққатан бозпас гирифта шудаанд.
Ёдрас мекунем, ки режими Тоҷикистон ба манзури ҷилавгирӣ аз эҳёи ислом дар кишвар солҳост аз мамнӯъияти таълими динӣ ба кӯдакон то мамнӯъияти воридоти адабиёти исломӣ тадбирҳои мухталифро ба кор мебарад. Аз соли 2017 инҷониб феҳристи китобҳои мамнӯъ барои воридот ба кишвар ҷорӣ аст, ки аз ҷониби Кумитаи дин ва Вазорати корҳои дохилии Тоҷикистон тартиб дода шудаанд.
Домулло Шокирхон аз Душанбе ба таҳририяти Хабарҳо дар бораи вазъияти мазкур чунин шарҳ дод.
» Бале, режим барои дур кардани Ислом аз Тоҷикистон ҳар кори аз дасташ меомадаро мекунад, аз ҷумла манъи рафтани кӯдакон ба масҷид, маҳдудиятҳои бемаънӣ ва таъқиби бераҳмонаи мухолифин, манъи воридоти адабиёти исломӣ. Ин ба ман даврони ҳокимияти шӯравиро ба ёд меорад. Дар он замон низ ҳама чиз мамнӯъ буд, адабиёти исломӣ хеле кам буд, мардум бо мубодилаи китоб машғул мешуданд, бинобар оқибатҳои ногувори он ба ҳамдигар барои таҳсил ба вақти муайян китобро ба қарз медоданд. Мардуми тоҷик ҳам дар он замонҳои сахт тавонист дини хешро ҳифз кунад ва бовар дорам, ки ин дафъа низ бо изни Худованд ҳамин тавр мешавад» мегӯяд домулло.
