Бердимуҳаммадов писарашро ба мақоми президентӣ пешбарӣ кард
Писари раисиҷумҳури Туркманистон Қурбонгулӣ Бердимуҳаммадов Сердар ба унвони номзад ба мақоми раисиҷумҳури ин кишвар пешбарӣ шуд, интихоботи пеш аз мӯҳлат 12 март баргузор мешавад, хабар медиҳад Salam News. Ҳоло Сердар Бердимуҳаммадов мақоми муовини нахуствазирро бар ӯҳда дорад. Рӯзи 14 феврал дар Туркманистон маъракаи интихоботӣ оғоз шуда, дар ҷараёни он пешбарӣ, сабти ном ва мулоқоти онҳо бо интихобкунандагон сурат мегирад.
Қурбонгулӣ Бердимуҳаммадов аз моҳи феврали соли 2007 раисиҷумҳур аст ва ҳамзамон раҳбарии шӯрои вазиронро бар ӯҳда дорад. Вай ба интихоботи пеш аз мӯҳлат, ки рӯзи 11 феврал баргузор мешавад, ишора карда, изҳор намуд, ки қасд дорад, роҳро ба роҳбарони ҷавон бидиҳад. Дар баробари ин Бердимуҳаммадов возеҳ гуфт, ки ӯ ҳамчун раиси палатаи болоии парлумон – халқ маслаҳати боқӣ мемонад.
Пас аз чанд соат аз изҳороти Бердимуҳаммадов, Комиссияи марказии интихоботи Туркманистон баргузории интихоботи пеш аз муҳлати раёсати ҷумҳуриро (интихоботи навбатӣ бояд соли 2024 баргузор мешуд) эълон кард.
Сиёсатшинос Аркадий Дубнов дар сӯҳбат бо РБК тахмин кард, ки дар сурати интихоб шудани писари Бердимуҳаммадов сиёсати боз ҳам сахттарро аз падараш пеш мебарад. «Сердар як одами бениҳоят сахтгир аст, ҳатто аз дарки оддии зиндагии заминӣ аз падараш дуртар мебошад. Ӯ тобеонашро ба даҳшат меорад ва барои ин аллакай далелҳои зиёде мавҷуданд. Ӯ амудии қудратро ба таври боз ҳам ғайриинсонӣ тақвият хоҳад дод», — мегӯяд коршинос.
Ёдрас мекунем, ки Бердимуҳаммадови 40-сола дар режими Қурбонгулӣ дар вазифаҳои мухталифи баланд кор кард ва ба ин васила қаблан барои нишастан дар курсии падараш пас аз рафтани ӯ омодагӣ гирифт. Масъалаи кй вориси он мешавад, кайҳо дар Туркманистон ҳал шуда буд. Дар ҳамин ҳол, таҳлилгарон бо тавзеҳ додани ин ногаҳонӣ қайд мекунанд, ки ҳаводиси ахири марбут ба интиқоли қудрат дар кишварҳои ҳамсоя эҳтимол ба тасмими Бердимуҳаммадов барои супурдани курсии раёсатҷумҳурӣ ба писараш таъсир гузоштааст.
Қобили зикр аст, ки раисиҷумҳури Тоҷикистон Раҳмон низ чанд сол боз ба ин тариқ барои интиқоли қудрат ба писараш Рустам омодагӣ мебинад, ки дар ҳоли ҳозир раиси пойтахт ва раиси порлумони Тоҷикистонро бар ӯҳда дорад.
