Корманди милисаи тоҷик аз ҷавобгарии ҷиноӣ халос шуд

Кормандони милисаи тоҷик ба мақоми дахлнопазирӣ соҳиб мебошанд, ҳатто барои куштор низ  ба ҷавобгарии ҷиноӣ кашида намешавад, ибрози ақида намудаанд сокинони шаҳри Кӯлоб. Моҳи феврали соли ҷорӣ капитани милисаи ШВКД шаҳри Кӯлоб Саидмумин Исломов кӯдаки 15 сола Фирдавс Ҳалимовро бо нақлиёташ зада ба ҳалокат расонд, вале айбдоршавандаро дастгир накарданд. Акнун бошад хешутаборони ҳалокшуда дар хавф ҳастанд, ки ҷавобгарии ҳолати мазкурро ба худи ҳалокшуда бор мекунанд, иттилоъ медиҳад «Азия плюс».

Фоҷиаи мазкур шаби 13 феврал дар назди терминали Кӯлоб — Восеъ ба вуқуъ пайваст. Муфаттиши ШВКД шаҳри Кӯлоб капитани милиса Саидмумин Исломов бо нақлиёти худ шаҳрванд Фирдавс Ҳалимови 15 солаи талабаи мактаби рақами 6 шаҳри Кӯлобро зада ба ҳалокат расонд. Дар прокуратураи шахр гуфтаанд, ки парвандаи мазкур дарҳол махфӣ гардонида шуд. Аз он вақт як моҳ сипарӣ гашт ва тибқи иттилои прокуратура тафтишот идома дорад. «Айни замон тафтишот идома дорад ва чанд муддат пас хулосаи охирин бароварда мешавад», иттилоъ дод манбаъ дар прокуратураи шаҳри Кӯлоб.

Ба гуфтаи ӯ, «тафтишотро таҳлили гистологии ҷасади марҳум муайян мекунад. Таҳлили мазкур ба мо аниқ карда медиҳад, ки эҳтимолан ҷавон ба ягон касалӣ ба монанди касалии рӯҳӣ дучор шуда буд ё не».

Эҳтимол аст ки касалии мазкур дар роҳ авҷ гирифт ва ҷавон ба замин афтид ва нақлиёт ӯро зад.

«Таҳлили мазкур исбот хоҳад кард, ки оё нақлиёт ӯро задааст ё ин ки ҷавон бо марги худ дар онҷо фавтидааст», мегӯянд дар прокуратура.

Вале, ба гуфтаҳои волидайн, писар бача сиҳат буд ва тарзи зиндагии солим мебурд. Вақтҳои холӣ ҳаммонанди дигар писар бачаҳои Тоҷикистон дар бозор сабзавот мефурӯхту ба волидайн кӯмак мекард ва бо варзиш машғул буд. Яъне, волидайни писар бача касалӣ будани ӯро инкор мекунанд.

Дӯстон ва наздикони марҳум Фирдавс мегӯянд, ки чанд рӯз пас аз ҳодисаи нақлиётӣ Саидмумин Исломов ба ҷои зисти марҳум омада буд ва волидайни ӯро аз даст кашидани навиштани шикоят бовар кунонд.

«Дар баёнот бинависед, ки шумо аз капитани милиса Саидмумин Исломов шикоят надоред», гуфт ӯ.
«Бо талаби исроронаи капитани милиса волидайн маҷбур шуданд дар баёнот бинависанд, ки аз ӯ шикоят надоранд», мегӯянд наздикони марҳум.

Инчунин хешутаборони оилаи Ҳалимовҳо қайд менамоянд, ки ба назди волидайни марҳум Фирдавс модари капитан Саидмумин Исломов низ омада буд, бахшидани писарашро  ва аз навиштани шикоят даст кашиданашонро хоҳиш намуд.

Ба озмоиши гистологие, ки тафтишот бурда истодааст оем, ба гуфтаҳои наздикони Фирдавс писар бача сиҳат буд, «ӯ писари чолок буд, пас аз мактаб дар бозори «Саховат»-и шаҳри Кӯлоб картошка мефурӯхт ва ҳар рӯз 15 сомонӣ кор карда ба волидайни худ барои оилаи камбизоаташ кӯмак мекард. Бо варзиш машғул буд, дар вақтҳои холӣ футбол бозӣ мекард. Аз саломатияш шикоят намекард», мегӯянд онҳо ва хавф аз он доранд, ки акнун ӯро касалӣ буд ва гӯё «худ ба таги чархи нақлиёт афтидааст» хулоса мебароранд.