Рустами Эмомалӣ сенатор хоҳад шуд
Номзадии шаҳрдори Душанбе Рустами Эмомалӣ санаи 13-уми март дар иҷлосияи якуми Маҷлиси вакилони халқи пойтахти даъвати шашум, якдилона ба сифати сенатори пешбарӣ шуд, иттило дод «Азия-Плюс» бо истинод ба маъмурияти шаҳрдории Душанбе. Интихоботи аъзоёни нави Маҷлиси миллии Маҷлиси Олии Тоҷикистон санаи 27-уми марти соли ҷорӣ баргузор хоҳад шуд.
Ба ақидаи сиёсатшиносон ва коршиносони тоҷик ва хориҷӣ, Рустами Эмомалӣ наинки сенатор, балки раиси палатаи болоии парлумони кишвар интихоб хоҳад шуд. Бо ин ӯ расман дуввумин шахс пас аз президент дар Тоҷикистон мегардад.
Тибқи қонунҳои мавҷудаи Тоҷикистон, дар сурати истеъфо, эътироф кардани корношоям ва ё фавти президент, ӯҳдадориҳои президент то интихоби президенти нав ба зиммаи раиси Маҷлиси миллӣ, яъне раиси палатаи болоии парлумон вогузор карда мешавад.
Ёдрас мекунем, ки Рустами Эмомалӣ фаъолияти меҳнатии худро дар синни 19-солагӣ дар соли 2006 оғоз кардааст. То ба ин дам, Раҳмон писари худро дар зинаи маснад боло бурда, ҳамчун вориси худ омода кард. Пеш аз таъин шудан ба мансаби шаҳрдори пойтахти кишвар дар соли 2017, Рустам тавонистааст ҳамчун раис дар раёсатҳои гуногун фаъолият кунад. Соли 2009 ӯ сардори шӯъбаи дастгирии соҳибкорӣ дар Кумитаи давлатии сармоягузорӣ ва идораи амволи давлатии Ҷумҳурии Тотористон таъин гардид, солҳои 2011-2012 сардори шӯъбаи мубориза алайҳи ҳуқуқвайронкуниҳои гумрукии Хадамоти гумрукии назди Ҳукумати Ҷумҳурии Тоҷикистон таъин карда шуд. Солҳои 2012-2013 дар вазифаи муовини сардори Хадамоти гумруки назди Ҳукумати Ҷумҳурии Тоҷикистон кор мекард. Дар солҳои 2013-2015 вазифаи сардори Хадамоти гумруки назди Ҳукумати Ҷумҳурии Тоҷикистонро бар ӯҳда дошт. Аз моҳи марти соли 2015 бо фармони президент ба мансаби раиси Агентии назорати давлатии молиявӣ ва мубориза алайҳи коррупсияи Ҷумҳурии Тоҷикистон таъин карда шуд. Қаблан мушоҳидон таъиноти ояндаи Рустами Эмомалиро ба мансаби раиси палатаи болоии парлумон пешгӯӣ карда буданд.
