Сокинони ВМКБ аз фишорорӣ шикоят доранд
Ду омӯзгор аз ноҳияи Роштқалъаи ВМКБ ба расонаҳо муроҷиат карда, изҳор доштаанд, ки мақомоти корҳои дохилӣ онҳоро маҷбур кардаанд тариқи телевизиони маҳаллӣ баромад кунанд ва бо боз кардани парвандаи ҷиноӣ таҳдид карданд.
Омӯзгорони мактаби рақами 6-и деҳаи Шикуш, Наргис Ҷонмирзоева ва Азиза Қарачабекова, гуфтанд, ки онҳоро ба Раёсати корҳои дохилии ВМКБ даъват карда, маҷбур кардаанд, ки дар телевизиони маҳаллӣ дар бораи эътирозҳои дар Хоруғ шуда гузашта суханронӣ кунанд ва ҳамчунин чанд нафарро ҷинояткор бихонанд.
«Моро ба он ҷо даъват карданд, ки ба яке аз муаллимонамон тавсифнома диҳем. Аммо вақте, ки ба онҷо расидем, кормандони шуъбаи корҳо оид бо ноболиғон Майсара Азизбекова ва Шоймардонов ба мо фишор оварда, маҷбур карданд, ки матни тақдимкардаи онҳоро дар назди камераҳо бихонем. Дар ин матн эътирозгарон ва чанд нафари дигар ҷинояткор номида шудаанд, аммо мо аз гуфтани ин суханон худдорӣ кардем. Сипас ба мо гуфтанд, ки аз болои мо парвандаи маъмурӣ кушода мешавад ва баъд доғи судӣ мемонад, метавонанд маошамонро кам кунанд… Фишорорӣ хеле сахт буд. Мо маҷбур шудем, ки розӣ шавем, то ин ки зудтар аз он ҷо биравем», мегӯянд Ҷонмирзоева ва Қарачабекова дар мактуби худ.
Ба гуфтаи онҳо, бо вуҷуди он ки онҳо танҳо бахшеро, ки масъулияти волидайн дар тарбияи фарзанд таваллуқ дошт хондаанд, хешовандон ва ҳамдеҳагон онҳоро барои ин амалашон маҳкум кардаанд. Муроҷиатҳои батакрор ба телевизион ва ниҳодҳои мухталиф бо талаби боздоштани намоиши онҳо натиҷае надоданд ва онҳо маҷбур шуданд, ки ба расонаҳо муроҷиат кунанд. «Мо ба мардум мехостем бирасонем, ки ин ташаббуси шахсии мо набуд», — мегӯянд занҳо.
Ёдрас мекунем, ки моҳи ноябри соли гузашта сокини маҳаллӣ Гулбиддин Зиёбеков аз сӯи нерӯҳои амниятӣ кушта шуда буд, ки боиси эътирозҳои шиддатноки сокинони Бадахшон бо талаби таҳқиқи воқеъбинона ва муҷозоти гунаҳкорон гардид. Дар посух, режими тоҷик бо истифода аз васоити ахбори умум як маъракаеро оғоз кард, то эътирозгаронро бадном кунад. Шаш фаъоли «Гурӯҳи 44», ки аз сокинони маҳаллӣ иборат аст ва барои таҳқиқи ҳодисаҳои моҳи ноябр таъсис ёфтаанд, то қонеъ шудани талаби онҳо аз ҳамкорӣ бо мақомот худдорӣ карданд. Ба гуфтаи онҳо, аз ин ҳамкориҳо қаноатманд нестанд, вақте ки ҳеҷ кас вазъи ҳалоку осеб дидани мардуми осоиштаро таҳқиқ намекунад, балки ба ҷои ин мақомот ошкоро аз мардум қасос гирифта, бо ҳар сабаб мардумро ба ҷавобгарӣ мекашад.
«Дар маҷмӯъ, мурофиа карда нашудааст: танҳо фишор ва айбдоркунии мардум вуҷуд дорад. Барои дарахти буридашуда шумо метавонед зиндонӣ гардед, аммо далели марги одамон — касе инро фаҳмидан намехоҳад. Мо дигар ин тавр кор намекунем. Ё ҳама гунаҳкорон муҷозот мешаванд, ё умуман ҳамкорӣ нахоҳем кард”, — гуфт Хуҷамрӣ Пирмамадов, сухангӯи “Гурӯҳи 44”.
