Тамринҳои ИМА дар Тоҷикистон
Чи тавре ки Сафорати Амрико дар Тоҷикистон хабар дод, рӯзи 10 август тамринҳои низомии аз ҷониби Фармондеҳии марказии ИМА ташкилшуда дар Тоҷикистон шурӯъ гардиданд.
Сафири ИМА Ҷон Марк Поммершайм ёдовар шуд, ки тамрини низомии «Ҳамкории минтақавӣ-2022», ки то 20 август идома мекунад, бузургтарин тамрини низомии ИМА бо иштироки кишварҳои Осиёи Марказӣ ва Ҷанубӣ мебошад. «Ҳамкории минтақавӣ-2022 яке аз бузургтарин тамринҳои низомии ИМА бо иштироки кишварҳои Осиёи Марказӣ ва Ҷанубӣ мебошад. Он ба мо имкони беҳамтоеро барои таҳкими равобит бо шарикони худ дар минтақа фароҳам меорад», гуфт ӯ.
Бинобар иттилои сафорат, дар тамрини шашрӯзаи посгоҳи фармондеҳӣ ширкаткунандагон аз Иёлоти Муттаҳида, Тоҷикистон, Қазоқистон, Қирғизистон, Ӯзбекистон, Покистон ва Муғулистон ширкат хоҳанд кард. Тоҷикистон ва ИМА ҳамчунин як ҷузъи дуҷонибаи панҷрӯзаи тамрини саҳроӣ дар Маркази таълимии Фахробод баргузор мекунанд.
Сиёсатшинос ва мудири кулли Шӯрои умури байналмилалии Русия Андрей Кортунов аз Кремл даъват кард, ки ба ҳодисаҳои рухдода вокуниш нишон диҳад. «Манфиати ИМА ба гузаронидани тамринҳои низомӣ дар Осиёи Марказӣ хеле равшан аст. Як сол пеш онҳо нерӯҳои худро аз Афғонистон берун оварданд. Ин ба мавқеъҳои онҳо дар минтақа таъсири ҷиддӣ расонд. Акнун онҳо бояд худро дар минтақа барқарор кунанд, — гуфт ӯ ба хабарнигори «Взгляд». «Дар мавриди кишварҳои пасошӯравӣ бошад, ҳар кадоми онҳо кӯшиш мекунанд, ки сиёсати хориҷии бисёрвекториро пеш баранд. Барои ҳамин, онҳо ба чунин ҳамкорй бо Вашингтон манфиатдор мебошанд. Вале набояд фаромӯш кард, ки дар ҳоли ҳозир ИМА на шарики потенсиалӣ, балки ҳарифи сиёсии мост. Ҳатто бо дарназардошти он, ки дар Афғонистон мо бо онҳо зиддияти ҷиддӣ надорем”, — таъкид кард Кортунов.
Ба гуфтаи ходими пешбари пажӯҳишгоҳи байналмилалии Донишкадаи равобити байналмилалии Москваи Вазорати корҳои хориҷии Русия Александр Князев, танҳо Ӯзбекистон қодир аст, ки сиёсати воқеии бисёрвекториро дар Осиёи Марказӣ пеш барад. «Дар ихтиёри ҷумҳурӣ потенсиали ҷуғрофӣ, захирагӣ, коммуникатсионӣ ва иқтисодӣ мавҷуд аст. Тоҷикистон аз ҷумлаи он кишварҳост, ки бо кӯшишҳои манёврии худ дар байни марказҳои ҷаҳонии қудрат дар ояндаи наздик метавонад дар бунбаст қарор гирад”, — мегӯяд Князев.
Қобили зикр аст, ки тамринҳои низомии “Ҳамкории минтақавӣ” бо ширкати Иёлоти Муттаҳида, кишварҳои Осиёи Марказӣ ва Ҷанубӣ аз соли 2004 инҷониб ҳамасола баргузор мешавад, аммо танҳо дар соли ҷорӣ бо дарназардошти заъиф шудани мавқеи Русия дар пасманзари нокомии ҳарбӣ ва сиёсӣ дар Украина, аксарият онҳоро дар назари нав диданд.
