Режими Туркманистон таъқиботро густариш медиҳад
Тибқи як гузориши муштараке, ки аз тарафи созмонҳои ҳуқуқи башари Шарикии Байналмиллалӣ оид ба ҳуқуқи инсон (IPHR) ва Ташаббуси Туркманистон оид ба ҳуқуқи инсон (TIHR) таҳия кардаанд, мақомоти Туркманистон таъқиботро нисбат ба онҳое, ки фаъолона онҳоро дар шабакаҳои иҷтимоии дохили кишвар танқид мекунанд, ё дар гирдиҳамоиҳои зиддиҳукуматӣ дар хориҷа ширкат меварзанд, шиддат бахшиданд.
Дар гузориши мазкур омадааст, ки аксарияти онҳое, ки сиёсати саркӯбгаронаи режими Туркманистонро ошкоро танқид мекунанд, донишҷӯёне ҳастанд, ки дар донишгоҳҳои хориҷӣ таҳсил мекунанд ва ё муҳоҷирон ва гурезагон мебошанд, ки дар хориҷи кишвар зиндагӣ мекунанд. Мақомоти Туркманистон беш аз пеш ба тариқи таҳдид ба ин фаъолон фишор меоранд. Барои ин, дар аксари ҳолатҳо, онҳо ба боздошт ва бозпурсии хешовандони худ, ки дар Туркманистон зиндагӣ мекунанд, муроҷиат мекунанд. Ҳар қадар фаъолтар бошад, фишор ба хешовандони фаъол бештар мешавад.
Илова бар воситаҳои тарсонидан, мақомот инчунин ба кӯмаки мақомоти кишварҳои дӯсти худ муроҷиат мекунанд. Масалан, фаъолоне, ки дар амалҳои зиддиҳукуматӣ дар Русия ва Туркия ширкат доштанд, аз ҷониби маъмурони амниятии маҳаллӣ боздошт шуданд ва донишҷӯёни туркман низ аз ҷониби маъмурияти донишгоҳҳояшон огоҳонида шуданд.
Дар робита ба он фаъолоне, ки дар дохили кишвар ҷуръати интиқоди режими Туркманистон ва ё ҳамкорӣ бо нерӯҳои мухолифин дар хориҷро доранд, алайҳи онҳо парвандаҳои ҷиноии бофташуда оғоз мешаванд.
Раиси Ташаббуси Туркманистон оид ба ҳуқуқи инсон Фарид Тухбатуллин зимни муаррифии гузориш гуфт, ки онҳо барои баргардонидани ҷараён ва хотима додан ба таъқибот ба кӯмаки ҷомеаи ҷаҳонӣ ниёз доранд.
Қобили зикр аст, ки ҷомеаи ҷаҳонӣ сӣ сол аст, ки барои ҳамкорӣ бо режимҳои ҳукмравоии кишварҳои минтақаи Осиёи Марказӣ шароити мутақобилан судмандро меҷӯяд ва аз ҷиноятҳои содиркардаи онҳо чашм мепӯшад, танҳо гоҳ-гоҳ саволҳои марбут ба сиёсати саркӯбии мақомоти минтақавиро ошкор мекунад ва он ҳам бошад танҳо дар замон ошкор мекунанд, ки ба манфиатҳояшон рост ояд.
