Дар Ӯзбекистон сифркунӣ ба нақша гирифта шудааст
Рӯзи 22 июн дар брифинги расонаҳои хабарӣ мақомоти Ӯзбекистон хабар доданд, ки лоиҳаи қонун дар бораи ворид намудани тағйиру иловаҳо ба сарқонуни кишвар ба палатаи қонунгузории Олии Маҷлиси Ӯзбекистон пешниҳод шудааст.
Тибқи иттилои шабакаи расмии Комиссияи конститутсионӣ дар Telegram, тағйиру иловаҳои пешниҳодшуда 66 моддаи Қонуни Асосиро дар бар мегирад. Ислоҳоти конститутсиониро президент Шавкат Мирзиёев рӯзи 6 ноябри соли гузашта дар маросими савгандёдкунӣ эълон карда буд.
Тағйиру иловаҳо аз 5 то 7 сол зиёд кардани мӯҳлати раёсатҷумҳурӣ ва сифр кардани давраи қаблии президенти феълии Ӯзбекистонро пешбинӣ мекунад.
Муовини аввали раиси Сенати Ӯзбекистон Содиқ Сафоев дар мусоҳиба бо хабаргузории Kun.uz таъйид кард, ки ислоҳот ба Қонуни асосии кишвар давраи президентии қаблии Шавкат Мирзиёевро “сифргузорӣ” мекунад.
«Агар сарқонуни нав қабул шавад, он бешубҳа ба ҳамаи шаҳрвандон, аз ҷумла ба президенти кунунии мо имкон медиҳад, ки дар интихобот тибқи Сарқонуни нав иштирок кунад. Оё раисиҷумҳури мо аз ин фурсат ва ҳуқуқ истифода мекунад ё на, бояд худи ӯ ва ҳизби сиёсие, ки ӯ намояндагӣ мекунад, тасмим бигирад. Аммо ӯ ҳақ дорад, ин корро анҷом диҳад», — гуфт Сафоев.
Ёдрас мекунем, ки чунин «сифркунӣ» барои Русия ва мутаносибан барои кишварҳои Осиёи Марказӣ, ки зери таъсири он аст, хос аст, ки диктаторҳо шеваи русии нигоҳ доштани қудрати худро нусхабардорӣ мекунанд.
