Диктаторҳо қатли омро дар Нукус тасдиқ карданд
Бинобар иттилои дафтари матбуоти раисиҷумҳури Ӯзбекистон, Владимир Путин аз «тадбирҳои қатъии ҳукумати Ӯзбекистон барои ба эътидол овардани вазъ дар Қарақалпоқистон» пуштибонӣ кардааст. Ин дар ҷараёни гуфтугӯи телефонии Шавкат Мирзиёев ва Владимир Путин, ки рӯзи 5 июл сурат гирифт, рух дод.
Қаблан, рӯзи 4 июл раисҷумҳури Ӯзбекистон бо сарони давлатҳои Тоҷикистон, Қазоқистон ва Қирғизистон гуфтугӯи телефонӣ анҷом дод. Ҳамаи онҳо ҷонибдории комили худро аз иқдомоти қатъии мақомоти Ӯзбекистон дар таъмини субот дар кишвар изҳор доштанд, хабар медиҳад сомонаи президенти Ӯзбекистон. Туркманистон низ аз амалкарди режими Ӯзбекистон пуштибонӣ кард, рӯзи 5 июл вазорати умури хориҷаи Туркманистон паёми мувофиқ нашр кард: “Ҷониби Туркманистон аз иқдомоти саривақтӣ ва қатъии раҳбарияти Ӯзбекистон барои таъмини амният ва сулҳи аҳолӣ, ҷиҳати ҳифзи сохти конститутсионӣ ва тартиботи ҳуқуқӣ дар кишвар ҷонибдорӣ мекунад».
Зимни саркӯб кардани эътирозҳо дар робита ба ворид намудани тағйиру иловаҳо ба Сарқонуни Ӯзбекистон, ки аз маҳрум сохтани мақоми мухторияти Қарақалпоқистонро низ пешбинӣ мекунад, танҳо тибқи маълумоти расмӣ, 18 нафар (4 корманди ҳифзи ҳуқуқ ва 14 нафар аҳолии осоишта) кушта шуда, зиёда аз 250 нафар ҷароҳат бардоштанд, зиёда аз 500 нафар боздошт шуданд, як қисми боздоштшудагон аз Қарақалпоқистон ба вилоятҳои дигари Ӯзбекистон интиқол карда шуданд. Ба гуфтаи ҳомиёни ҳуқуқ, шумори воқеии қурбониён шояд бештар бошад.
Ёдрас мекунем, ки тазоҳуроти эътирозӣ дар аввали соли ҷорӣ дар ҷануби Қазоқистон ва моҳи май дар ВМКБ-и Тоҷикистон ҳамин тавр саркӯб шуда буд.
