Мансабдори ӯзбек даври ҳукмронии Каримовро зери танқид қарор дод
Мақомоти Ӯзбекистон гуфтанд, ки дар даври Ислом Каримов Васоити ахбори оммаи Ӯзбекистон василаи таблиғи сиёсати режим буд ва инчунин барои ташкили парастиши шахсияти ӯ кор мекард.
Дар ин бора раиси Шӯрои парасторони Фонди ҷамъиятии дастгирӣ ва рушди ВАО миллӣ Комил Алламҷонов дар як конфронси байналмилалии онлайнӣ, ки 28-уми сентябр ба муносибати Рӯзи байналмилалии дастрасии ҳаматарафаи иттилоотӣ баргузор шуд, изҳор дошт.
«То соли 2016 матбуоти Ӯзбекистон дар ҳолати кома буд. Вай на зинда буд ва на мурда. Дар телевизион ситоишҳо зиёд буданд ва дар рӯзномаҳо танҳо «хабар аз осмон». Ҳоло ин метавонад хандовар ба назар расад, аммо мутаассифона, чунин буд. Давлат на аз интиқоли иттилооте, ки аҳолӣ ба он ниёз дошт, балки иттилооте, ки онро дуруст мешуморид, нигарон буд. Тамоми матбуот танҳо барои як нафар, барои табъи сарвари вақти онвақта кор мекард», — гуфт Комил Алламҷонов.
Ба гуфтаи Алламҷонов, дар даври ҳукмронии Каримов матбуоти Ӯзбекистон мушкилоти мардумро хеле кам инъикос мекард; шикоятҳои рӯзноманигорон дар шабакаҳои иҷтимоӣ ниҳонӣ нашр мешуданд. Алламҷонов инчунин қайд кард, ки дар тӯли чор соли охир матбуот дар кишвар ба таври назаррас озод гардид ва хабарнигорон имконият пайдо карданд, ки ҳодисаҳои воқеии кишварро инъикос кунанд.
Ҷолиби диққат аст, ки Президенти кунунӣ Мирзиёев дар даври ҳукмронии Каримов дар яке аз вазифаҳои асосии режим буда, мансаби сарвазирро ишғол мекард.
Коршиносон қайд мекунанд, ки паст задани сиёсати пешгузашта нишонаи асосии режимҳои худкома дар Осиёи Миёна мебошад. Ҳамин тавр, моҳи январи соли равон Мирзиёев зимни суханронӣ дар назди вакилони нави Палатаи қонунбарорӣ аллакай изҳор дошт, ки даври раёсати Ислом Каримовро метавон замони тарс номид. «Мо дар замони тарс зиндагӣ мекардем», гуфта буд Мирзиёев дар он замон.
Ёдрас мекунем, ки моҳи майи соли ҷорӣ ду тан аз хабарнигорони варзишӣ муҳаррири шабакаи телевизионии Sport Бобур Акмалов ва директори генералӣ Ҷамолиддин Бобоҷонов пас аз интиқоди оқибатҳои обхезии аввали моҳи май дар телевизиони давлатӣ аз кор маҳрум шуданд.
