Аз соли 2025, тибқи маълумоти сомонаи «Консультант Плюс», ба истиснои Ҷумҳурии Хакасия, арзиши патент дар ҳамаи минтақаҳои Русия боло рафтааст. Хусусан дар шаҳри Москва, ки бисёре аз муҳоҷирони тоҷик барои кор ба он ҷо мераванд, нархи патент аз 7500 то 8900 рубл боло рафт. Дар вилояти Новосибирск арзиши моҳонаи патент аз 6300 то 7900 рубл афзоиш ёфтааст. Нархи баландтарини патент дар Краснодар 17 ҳазор рубл мебошад. Дар ҷои дуюм ва сеюм вилояти Челябинск бо 15 ҳазор рубл ва вилояти Твер бо қариб 15 ҳазор рубл қарор доранд. Бо дарназардошти паст шудани қурби рубл, барои муҳоҷирон ин хароҷоти иловагии назаррас мебошад.
Дар соли 2025 як қатор қоидаҳои нави назорат нисбати шаҳрвандони хориҷӣ ва шахсони бешаҳрвандӣ мавриди амал қарор гирифтанд: Дастрасӣ бе иҷозатнома ба манзил. Тибқи тағйирот дар қонунгузорӣ, кормандони пулис метавонанд бе иҷозати махсус ба манзилҳое, ки дар он ҷо муҳоҷирони эҳтимолии депортатсияшаванда зиндагӣ мекунанд, ворид шаванд. Дастрасӣ ба маълумоти шахсӣ. Мақомоти ҳифзи ҳуқуқи Русия акнун ба маълумот ва ҳуҷҷатҳо барои санҷиши муҳоҷирон, аз ҷумла маълумот дар бораи ҳисобҳои бонкӣ ва истифодаи онҳо, дастрасӣ доранд.
Аз 1 январи соли 2025 мӯҳлати ҳадди аксари будубоши хориҷиён бе раводид кам карда шуд. Агар пештар 90 рӯз дар нимсола бошад, ҳоло 90 рӯз дар як сол иҷозат дода мешавад.
