• Home »
  • Habarho »
  • Дар Душанбе назди сафоратхонаи Эрон намоиши эътирозӣ баргузор гардид

Дар Душанбе назди сафоратхонаи Эрон намоиши эътирозӣ баргузор гардид

Санаи 21-уми маӣ дар назди бинои сафоратхонаи Эрон намоиши эътирозӣ баргузор гардид, ки дар он даҳҳо нафар ҷамъшудагон бо шиорҳои ба мисли «Мо такроршавии солҳои 1999-2000 намехоҳем», «Аз мардуми Тоҷикистон чи мехоҳед», «Фарзандони моро баргардонед» ва ҳоказо иштирок намуданд.

Аксарияти иштирокчиёни намоиши эътирози ҷавонон буда, шиорҳои онҳо аз фикрҳои ватанпарастӣ иборат буд, ки ба манфиати режими кунунӣ буда, бар хилофи ҲНИТ ва Муҳиддин Кабирӣ нигаронида буд: «Касе ҳуқуқ надорад ба сиёсати давлатии Тоҷикистон мудохила намояд», «Худоро сипосгузорем, ки соҳиби чунин давлат ҳастем ва бо туфайли Эмомалӣ Раҳмон онро тамоми ҷаҳон мешиносад», «Нест бод терроризм ва Кабирӣ». Навори видеоиро аз ҷои ҳодиса бисёрии ОИ, аз ҷумла ВАО-и тобеи ҳукумат нашр намуданд. Намоиши мазкур тақрибан 30 дақиқа тӯл кашид, сипас намоишгарон пароканда гашта, касе аз онҳо дастгир нашудаанд.

Мушоҳидон қайд мекунанд, ки тӯли 20 сол аст, ки дар кишвар намоишҳои эътирозӣ ғайр аз якчанд намоишҳои давлатӣ, ки барои расонидани мавқеи давлат нисбати ҳодисаи муқарраршуда гузаронида нашудааст. Намоишҳои эътирозии соли 2013 дар назди бинои намояндагии СММ ва сафоратхонаи ИМА дар Тоҷикистон бо талаби истихроҷи собиқ сарвазир Абдумалик Абдуллоҷонов аз Украина ва намоиши эътирозии соли 2016 дар назди бинои сафоратхонаи ИА (Иттиҳоди Аврупо) ва Туркия, инчунин  дар назди бинои ОБСЕ баргузор гардид, ки дар он гурӯҳе аз ҷавонон бо номи «Авангард» аз давлатҳои дар боло зикршуда талаб намуданд, ки ба фаъолони тоҷик, ба аъзоёни гурӯҳи 24 ва ба аъзоёни ҲНИТ паноҳгоҳ ва ҳимоя надиҳанд.

Дар инҷо вокуниши ҳукумат оид ба даъвати мухолифин барои гузаронидани намоиши эътирозӣ, ки санаи 10-уми октябри соли 2014 шуда буд ёдрас бояд кард. Ҳарчанд дар он рӯз намоиши эътирозӣ баргузор нагардид, вале он рӯз пойтахт ҳолӣ гашт, мардуми кишвар метарсиданд ба кӯча бароянд. Дар назди ҳар як масҷид кормандони мақомоти қудратӣ бо либоси шаҳрвандӣ ва нақлиётҳои бо шишаҳои сиёҳ, ки дар он гурӯҳе аз ОМОН ва СОБР бо яроқу аслиҳа дар ҳолати тайёр қарор доштанд, навбатдорӣ мекарданд. Ҳамаи майдонҳои кишвар аз тарафи кормандони ВКД ва КДАМ ба иҳота гирифта шуда буд.