Мақомоти Тоҷикистон ба нобиноён гӯш кардани маърӯзаҳоро манъ мекунад
Маъюби чашм Содиқҷон Бачгонов 26-уми феврал дар муҳосиба бо радиои Озодӣ гуфт, ки корманди шӯъбаи дин, анъана ва ҷашну маросимҳои миллӣ ба маъюбони Комбинати омӯзиши истеҳсолии шаҳри Ҳисор пахши маърӯзаҳои диниро тариқи радиои маҳаллӣ манъ мекунад, ки ҷиҳозаш ба маблағи шайхи араб харидорӣ карда шудааст.
«Ҳар саҳар соати 8 мо барномаи радиои «Имрӯз»-ро пахш мекунем ва ҳар ҷумъа рӯҳониён ба суолҳои диндорон посух медиҳанд… Рӯзи ҷумъаи гузашта, корманди шӯъбаи дини маҳаллӣ Саъдулло Норов ба студияи ман ворид шуд ва талаб кард, ки флешкорти дар дохилаш маърӯзаҳои динӣ доштаро ба ӯ бидиҳам. Ман талаби ӯро рад кардам ва изҳор намудам, ки қонуне вуҷуд надорад, ки маърӯзаҳои воизони маъруфро манъ кунад», — гуфт Содикҷон Бачгонов. Ба гуфтаи ӯ, маърӯзаҳое, ки барои нобиноён тариқи радио пахш мешавад, хусусияти ахлоқӣ ва маърифатӣ дорад.
Саъдулло Норов, дар навбати худ, гуфт, ки вай бо мансабдорони дигари маҳаллӣ 6 маротиба ба Комбинати омӯзиши истеҳсол ташриф овардааст ва аз Бачгонов талаб кардааст, ки пахши мавъизаҳоро қатъ кунад. «Тибқи қонун, таблиғи дин дар ҷойҳои ҷамъиятӣ, аз ҷумла пахши маърӯзаҳои динӣ манъ шудааст», — гуфт Саъдулло Норов.
Маъюбони чашм аз он изҳори норозигӣ мекунанд, ки корманди шӯъбаи дин танзими анъана ва ҷашну маросимҳои миллӣ бо тариқи радиои маҳаллӣ интиқоли маърӯзаҳои диниро манъ мекунад.
