Эмомалӣ Раҳмон бо узви партияи коммунистии Чин мулоқот намуд
Санаи 1-уми марти соли ҷорӣ Эмомалӣ Раҳмон бо узви партияи коммунистии Чин ва роҳбари дафтари Комиссияи корҳои хориҷии Ҳизби коммунисти Чин Ян Тзечи мулоқот намуд, иттило дод хадамоти матбуотии раисҷумҳур. Дар мулоқот раисҷумҳури Тоҷикистон кишвари Чинро шарики ҳамаҷонибаи стратегӣ арзёбӣ намуд.
«Мавзӯи сӯҳбат дар мулоқот вазъи кунунӣ ва дурнамоии ҳамкориҳои ҳамаҷонибаи Тоҷикистону Чин, аз ҷумла дар доираи муколамаи байни ҳизбҳо буд. Бо назардошти ин, таъкид шудааст, ки муносибатҳои ҳизбҳо ҷузъи муҳими муносибатҳои Тоҷикистону Чин буда, ба таҳкими дӯстӣ ва ҳамсоягии неки мардумони ду давлат мусоидат мекунад», — гуфта шудааст дар хабар. «Дар мулоқот инчунин масоили ҳамкории Тоҷикистону Чин дар соҳаи амният, мубориза бар зидди терроризм ва экстремизми байналмилалӣ, ҷинояткории муташаккили трансмиллӣ ва дигар зуҳуроти манфии ҷаҳони муосир баррасӣ шуд», — ҷамбаст кард хадамоти матбуотии раисҷумҳур.
Бояд қайд кард, ки кишвари Чин қарздиҳандаи асосии Тоҷикистон мебошад. Тибқи иттилои Вазорати молияи Тоҷикистон, қарзи берунаи Тоҷикистон дар аввали нимаи дуюми соли 2019 тақрибан 2,9 миллиард долларро ташкил додааст, ки аз он 1,5 миллиард (зиёда аз 52%) қарзҳои имтиёздодаи ҳукумати Чин мебошад.
Маълум аст, ки режими Раҳмон қаблан ба шарики стратегияш тақрибан 1,5 ҳазор километри мураббаъи заминҳои Тоҷикистонро дар ноҳияи Мурғоби Вилояти Мухтори Кӯҳистони Бадахшон ки бо захираҳои сангҳои қиматбаҳо, уран ва минералҳо бой аст, тӯҳфа карда буд. Ёдрас бояд кард, ки ҶМЧ тӯли солҳои дароз аст ки сиёсати решакан кардани ҳувияти исломии мусулмонони дар қаламрави ишғолшудаи Туркистони Шарқӣ зиндагӣ мекунанд пеш гирифтааст.
