Тоҷикистон: ҲХДТ барои обунашавӣ ба нашрияҳои ҳизб маҷбур мекунад
Ҳуҷайраҳои маҳаллии Ҳизби Халқии Демократии Тоҷикистон (ҲХДТ) дар шаҳри Истаравшан кормандони муассисаҳои давлатиро маҷбур мекунанд, ки ба нашрияҳои ҳизби ҳукмрон обуна шаванд. Ҳамин тавр, Кумитаи иҷроияи ҲХДТ дар шаҳри Истаравшан ба ҳамаи корхонаю муассисаҳо мактуби расмӣ ирсол намуд, ки ба шумораи муайяни нусхаҳои нашрияҳои ҳизби ҳоким обуна ҳатмӣ аст. Манбаи портали иттилоотии Akhbor.com мегӯяд роҳбари яке аз корхонаҳои шаҳр аз рӯй ин ҳодиса норозигии худро изҳор намуд. «Рӯзи гузашта намояндагони ҲХДТ бо ин нома ва нақшаи қаблан тасдиқшуда ба назди мо омаданд. Муассисаи мо, ки дар он ҳамагӣ 12 нафар кор мекунанд, бояд ба 15 нусхаи нашрияи «Минбари ҳалқ», 15 нусха — «Сухани халқ» ва 25 нусхаи «Афкори халқ» обуна гардад. Ин тақрибан 3500 сомонӣ, яъне тақрибан 300 сомонӣ ба ҳар як корманд рост меояд. ҲХДТ даъво дорад, ки ҳамеша дар баробари мардум фаъолият мебарад. Пас чаро дар ин замони мушкил ба мардуми камбизоат бори гарони обунашавиро ба нашрияҳои худ бор мекунанд?», — иброз намуд ӯ. Дар навбати худ, роҳбари ҲХДТ дар шаҳри Истаравшан Комил Мирзоев ба роҳбарони корхонаҳову муассисаҳо таҳдид кард, ки радкунии обунашавӣ ҳамчун радкунии дастгирии сиёсати президент Эмомалӣ Раҳмон дониста мешавад ва мақомоти амниятӣ нисбати онҳое, ки рад карданд, чораҳо меандешад.
«Комил Мирзоев ошкоро изҳор кард, ки иҷро накардани нақшаи обуна ҳамчун радкунии сиёсати президент Эмомалӣ Раҳмон қабул карда мешавад ва онҳое, ки рад карданд, ба ҷавобгарӣ кашида хоҳанд шуд. Оё ин суиистифода аз мансаб ва номи президент ва роҳбари ҲХДТ нест? Дар кадом давлат мақомоти ҳифзи ҳуқуқ ва амниятӣ нисбати онҳое, ки ба нашрияҳои ҳизби ҳукмрон обуна нашудаанд, чораҳо меандешад?», — хашмгин мешавад сокини шаҳри Истаравшан.
Ёдрас мекунем, ин бори аввал нест, ки кормандони ташкилотҳои буҷавӣ дар Тоҷикистон аз обунашавии ҳатмӣ ба нашрияҳои давлатӣ ва нашрияҳои ҳизби ҳоким шикоят мекунанд. Ҳар сол муаллимон, табибон ва дигар кормандони давлатӣ маҷбур мешаванд, ки барои обуна ба нашрияҳо аз 200 то 500 сомонӣ сарф кунанд, ки барои онҳо тамоман лозим нестанд.
