Афзоиши сатҳи бекорӣ дар Осиёи Миёна
Коршиносони Бонки ҷаҳонӣ брифинги онлайн бо номи «COVID-19 дар Осиёи Марказӣ: Камбизоатӣ ва таъсири иҷтимоию иқтисодӣ» — ро ташкил карданд, ки дар рафти он коршиносон таъсири пандемияи коронавирус ба иқтисодиёт ва таъсири эпидемияро муҳокима карданд.
Ҳангоми гуфтугӯ бо рӯзноманигорон, коршиноси Бонки Ҷаҳонӣ оид ба Осиёи Марказӣ, иқтисодчи Уилям Зейтс таъсири пандемия ба бозори меҳнатии Осиёи Миёнаро баҳогузорӣ намуд. «Мо кӯшиш дорем, ки ба қадри имкон маълумоти бештаре пайдо намоем, ин нишондиҳандаҳои пешгӯӣ мебошанд, то бубинем, ки бозори меҳнат ба кадом самт равона аст», — иброз намуд коршинос.
Ба ақидаи Зейтс, яке аз меъёрҳои асосӣ ин шумораи ҷойҳои кории холӣ мебошад. «Дар Ӯзбекистон, сомонаи интернетии машҳур омореро нашр кардааст, ки шумораи ҷойҳои кории кушода нисбати соли гузашта ба 75% ва дар баъзе соҳаҳо бошад то 90% коҳиш ёфтааст. Вазъияти ҳаммонанд дар Тоҷикистон ва дар Қазоқистон низ мушоҳида карда мешавад», — нақл намуд коршинос. Зайтс пешгӯӣ карда мегӯяд, ки бозори меҳнати дар Осиёи Миёна ба зудӣ барқарор нахоҳад шуд.
Ёдрас мекунем, ки танҳо дар Ӯзбекистон, тибқи маълумоти Вазорати меҳнати ҷумҳурӣ, аз аввали карантин, шумораи бекорон аллакай ба 600 ҳазор нафар афзуда, ба 2 миллион нафар расидааст. Коршиносон изҳори нигаронӣ мекунанд, ки дар кишварҳое, ки шароити иқтисодиашон бад аст, оқибатҳо метавонад хеле ҷиддӣ бошад.
