Абхазистон: Ӯзбекҳо маҷбуранд дар кӯча зиндагӣ бикунанд
Садҳо муҳоҷирони ӯзбек дар марзи Абхазистон ва Русия аз сабаби набудани имконияти баргаштан ба ватан, маҷбуранд дар кӯчаҳо зиндагӣ бикунанд.
Вазорати корҳои хориҷии Ӯзбекистон ва сафорат дар Русия ба муроҷиати шаҳрвандон эътибор намедиҳанд. Дар ин бора сомонаи «Kun.uz» бо истинод ба муҳоҷирони ӯзбек дар Абхазистон хабар додааст.
Ба гуфтаи Ренат Юсупов аз Сурхондарё, дар ҳоли ҳозир тақрибан 2 ҳазор шаҳрванди Ӯзбекистон дар Абхазистон қарор доранд. Онҳо барои кор кардан аз Русия ба ин ҷо омадаанд. Вақте ки марзҳо бар асари пандемия баста шуданд, шаҳрвандони Ӯзбекистон ба бекор кардани маҳдудиятҳои карантин умед дошта дар инҷо мондаанд.
Тақрибан се ҳафта қабл мақомоти Ӯзбекистон ваъда дода буданд, ки шаҳрвандони худро аз Абхазистон берун хоҳанд овард, аммо муҳоҷирони меҳнатӣ то ҳол дар кишвари бегона боқӣ мемонанд. Намояндагии дипломатӣ Ӯзбекистон дар Русия низ ба муроҷиатҳо вокуниш нишон надодаанд.
“Мо намехоҳем, ки ҳукумат моро ройгон бубарад, мо барои парвозҳои чартерӣ маблағ дорем. Ба мо танҳо аз Абхазия ба Русия гузаштан лозим аст”, — хашмгин шуда мегӯянд муҳоҷирони меҳнатӣ аз беамалии мақомоти Ӯзбекистон.
Шаҳрвандони Ӯзбекистон барои бозгашт ба ватан бояд вориди қаламрави Русия шаванд.
Дар ҳоли ҳозир танҳо ба шаҳрвандони Русия ва Абхазистон гузаштан аз марз иҷозат дода шудааст.
