Тафсири Ибни Касир дар Русия манъ карда шуд
Дар Русия феҳристи китобҳои мамнӯи исломӣ бо Қуръони Карим пур карда шуд. Ҳамин тавр, рӯзи 26-уми январ Суди вилояти Самара қарори Суди ноҳияи Красноглинскии шаҳри Самараро аз 18-уми августи соли 2020 дар мавриди эътироф кардани нашрияҳои зерин ҳамчун маводи экстремистӣ нигоҳ дошт:
- Тафсири Қуръони Карими Абул Фидо Исмоил ибни Умар ибни Касири Димишқи;
- Тафсири Қуръони Карим «Сабукӣ аз сӯи Бахшанда ва Меҳрубон» тарҷумаи маъногии Қуръон ба забони русӣ бо шарҳи Абдураҳмони Саъдӣ, тарҷума аз забони арабӣ муаллиф Э.Кулиев.
Дар навбати худ, ҳимоятгар Руслан Нагиев, ки аз ин китобҳо дифоъ кардааст, бо ҳукми Суди вилояти Самара розӣ набуда, изҳор дошт, ки аз болои ин қарор шикоят хоҳад бурд. Парвандаи манъи тафсирҳои дар боло зикршуда як сол пеш — моҳи январи соли 2019 оғоз ёфта буд. Қобили зикр аст, ки тафсири ибни Касир, ки мамнӯъ шудааст, як асари маъруфи динӣ маҳсуб мешавад, ки онро тамоми уламоҳои исломӣ ҳамчун манбаи мӯътабар барои омӯзиши Китоби Муқаддаси мусулмонон эътироф кардаанд.
Ёдрас мекунем, ки моҳи сентябри соли 2013 Додгоҳи ноҳияи Октябри Новороссийск даъвои додситонии нақлиёти шаҳрро дар бораи манъи тарҷумаи Қуръон ки муаллифаш Элмир Кулиев аст қонеъ кард. Аммо, дар моҳи декабри ҳамон сол, пас аз он ки тӯфони хашм аз ҷониби мусулмонон ва эътирози умумирусиягӣ бархост, суди вилояти Краснодар қарори суди ноҳияро бекор кард.
