Дар Душанбе — СҲШ, дар Калуга ва Суғд — ҳабси тоҷикон
Дар вилояти Калуга чанд нафар бо иттиҳоми аъзогӣ дар Ҳизби Таҳрир боздошт шудаанд, дар ин хусус рӯзи 27-уми январ Маркази робита бо ҷомеаии ФСБ иттило дод. Амалиётро нерӯҳои муштараки ФСБ ва Росгвардия анҷом доданд.
Бино ба гузоришҳои расонаҳо, ФСБ чанд нафарро боздошт карда, як қатор корҳои ҷустуҷӯӣ анҷом додааст, ки дар ҷараёни он «маводҳои таблиғотӣ, иртиботот ва васоити электронии дар Русия мамнӯъро» пайдо кардаанд. Тибқи иттилои вазорат, боздоштшудагон «бо истифода аз чораҳои махфӣ дар ҷараёни мулоқотҳо ақидаи террористиро дар байни сокинони минтақа паҳн карда, мусулмонони маҳаллиро ба сафҳои худ ҷалб мекарданд». Наворҳои боздоштро васоити ахбори омма, аз ҷумла шабакаи телевизионии Russia Today, ки ба манфиатҳои сиёсати хориҷии Русия нигаронида шудааст, васеъ инъикос карданд. Тибқи иттилои фаъолони ҳуқуқи башари Русия, ҳама ё баъзеи боздоштшудаҳо шаҳрвандони Тоҷикистон мебошанд.
Ҷолиби диққат аст, ки ин боздоштҳо дар пасманзари Шӯрои ҳамоҳангсозони миллии кишварҳои узви СҲШ, ки аз 26 то 29-уми январ таҳти раёсати Президент Раҳмон дар Душанбе баргузор шуд, сурат гирифтаанд.
Ҳамзамон, манбаъҳои Хабарҳо дар Хуҷанд низ дар бораи як қатор боздоштҳо, ки тақрибан ҳамон рӯзҳо дар шимоли Тоҷикистон рух дода буданд, хабар медиҳанд. Тибқи иттилои мавҷуда, афроде, ки аз муҳоҷирати меҳнатӣ аз Русия баргаштаанд, бо иттиҳоми даст доштан дар Ҳизби Таҳрир боздошт шудаанд.
Коршиносон мутобиқати возеҳи ин амалиёт ва саривақтии онҳоро ба чорабиниҳои муназзам дар доираи СҲШ қайд мекунанд, ки ин яке аз воситаҳои Русия барои таҳмил кардани сиёсати мустамликавии худ дар кишварҳои Осиёи Марказӣ мебошад, ки аз ҷумла, пешгирии эҳёи исломиро дар минтақа дар бар мегирад.
Аммо боздошту куштори пайвастаи муҳоҷирони меҳнатии бегуноҳ аз Осиёи Марказӣ, ба хотири манфиатҳои сиёсии дохилӣ ва хориҷӣ аз ҷониби мақомоти амниятии Русия аллакай ба он оварда расонид, ки агар шумо ба шарҳҳои истифодабарандагони Русия дар зери видео наворҳои дар шабакаи Ютуб ва дигар шабакаҳои иҷтимоӣ диққат кунед шоҳиди он мегардед, ки аҳолии Русия ба ингуна хабарҳо аллакай эътимод намекунанд.
