Мирзиёев «Қасри тиллоӣ» — ро рад кард
Президенти Ӯзбекистон Шавкат Мирзиёев вазъи атрофи нашри таҳқиқоти журналистии Радиои Озодлик дар бораи «қасри тиллоӣ» — и президентро шарҳ дод.
Мирзиёев изҳор кард, ки осоишгоҳи махфии дар кӯҳистон ҷойгир шуда, ба давлат тааллуқ дорад ва барои истироҳати «меҳмонони олиқадр» истифода мешавад.
«Касе дар он ҷо зиндагӣ намекунад ва ё он амволи шахсии каси дигар нест. Ин иншооти давлатӣ аст. Президент ба он чӣ иртибот дорад? Агар ба он ҷо меҳмони олиқадре ташриф намояд, ки барои Ӯзбекистон муфид аст, президент дар онҷо бо ӯ вомехӯрад», — посух дод Мирзиёев ба суоли як блогер.
Ёдрас мекунем, ки моҳи феврали соли ҷорӣ хабарнигорон мақолаеро дар бораи манзили махфии президенти Ӯзбекистон дар мамнӯъгоҳи биосфераи Угам-Чаткал, дар 100 километрии шимолу шарқи Тошканд ҷойгир шудааст нашр карданд.
Дар нахустин шарҳи худ Мирзиёев дар бораи тафтишот иброз дошт, ки ӯ ба амволи дар минтақаи дарёи Шоввозсой ҷойгир шуда ҳеҷ иртиботе надорад ва изҳороти қаблии ширкати роҳи оҳани Ӯзбекистон Темир Йӯллариро бори дигар такрор кард, ки ин истироҳатгоҳ қонунан моликияти ширкати Роҳи оҳан аст ва барои истироҳати коргарони «Ӯзбекистон Темир Йӯллари» сохта шудааст.
Ҷолиби диққат аст, ки ҳанӯз моҳи октябри соли 2018 Радиои Озодлик навори видеоиро нашр карда буд, ки дар он биноҳои саросемавор ороёфтаи бисёрошёнаи тамомнашуда ва тирезаҳои мағозаҳоро дар қабатҳои якуми ин биноҳои баландошёна дар кӯчаҳои маркази шаҳри Охангарон дар вилояти Тошканд намоиш дода шудаанд, ки дар наздикии қароргоҳи президент ҷойгир аст. Пас аз он дар Охангарон сару садоҳо паҳн шуданд, ки Шавкат Мирзиёев бо ҳамроҳии президенти Русия Владимир Путин ба он минтақа ташриф хоҳад овард.
«Расман ҳеҷ кас дар ин бора ба мо чизе нахоҳад гуфт. Аммо овозаҳо дар бораи он паҳн шуда буданд, ки Мирзиёев рӯзи 18-уми октябр ташриф хоҳад овард», — гуфта буд дар он замон ба Озодлик бо шарти ниҳонӣ як мансабдори маҳаллӣ.
