Ҳунарманди ӯзбек: риш аз шайтон аст
Ҳунарманди халқии Ӯзбекистон Ёдгор Саъдиев гузоштани риш аз ҷониби ҷавонони ӯзбекро танқид карда, онро як зуҳури шайтонӣ номидааст. Видео навор бо изҳороти мазкур рӯзи 17 июн дар шабакаи Интернет нашр шуд.
Ҳунарманд мӯътақид аст, ки чунин рише, ки ҷавонони Ӯзбекистон бештар мегузоранд, риши шайтонӣ мебошад. Ин изҳорот тӯфони хашм ва танқидро алайҳи Саъдиев ба бор овард. Баъзе порталҳои исломӣ суханони ҳунармандро таҳқири Ислом номиданд ва истифодабарандагони шабакаҳои иҷтимоӣ аз ӯ даъват карданд, ки ба чизе, ки намедонад, дахолат накунад. Масалан, яке аз корбарони Фейсбук Муродбек Фозилов дар бораи ин видео чунин шарҳ дод: «Ҳунарманде, ки дирӯз куртаи атласи занона ба бар кардааст, ҳаққи сӯҳбат дар бораи динро надорад. Агар ҳаргуна ҳаҷвнигор дар бораи риш ва рӯймол ҳарф занад, ӯзбекҳо кай осоиш пайдо мекунанд?”. Корбари дигари шабакаи иҷтимоӣ Камолиддин Билолов чунин қайд кардааст: «Тарбияи шӯравӣ дар симои ӯ ифода меёбад. Ӯ бояд фавран тавба кунад. Ман ҳайронам, ки ин шахс дар бораи дин чӣ мегӯяд, ки фарқи байни суннат ва ваҷибро ҷудо карда натавонад. Аллоҳ ин харро бубахшад.»
Ҷолиби диққат аст, ки гуфтаҳои Ёдгор Саъдиев дар сомонаи маъмурияти ноҳияи Уйчини вилояти Намангон, ки бори дигар мавқеи мақомотро нисбати афзоиши нуфузи Ислом дар байни ҷомеаи Ӯзбекистон, алахусус дар байни ҷавонон, таъкид кардааст, нашр шуд. Сарфи назар аз он, ки режими Ӯзбекистон дар бораи ислоҳотҳо сухан мегӯяд, хусусияти зиддиисломии сиёсати дохилии он боқӣ мемонад.
Ёдрас мекунем, ки тибқи гузоришҳои расонаҳо, дар аввалҳои моҳи июн дар шаҳри Ангрени вилояти Тошканд даҳҳо ҷавонон ба мақомоти корҳои дохилӣ даъват шуда буданд ва дар он ҷо ришҳояшонро ба таври маҷбурӣ тарошиданд.
