Токаев аз камбизоатӣ дар Қазоқистон нигарон шудааст
Президенти Қазоқистон Қосим-Ҷомарт Токаев рӯзи 21 январ дар мулоқот бо соҳибкорон гуфт, ки дар Қазоқистон олигополия – тамаркузи бузурги тиҷорат дар як даст вуҷуд дорад. Дар баробари ин, соҳибкорони қобилиятнок аз дастрасӣ ба захираҳо маҳруманд, хабар медиҳад КазТАГ.
«Олигополия ин хоҳиши доимии диверсификатсияи тиҷорат дар як даст аст, аммо на диверсификатсияи иқтисоди кишвар. Як нафар, як ширкат ҳам истихроҷ, ҳам коркард ва ҳам идора мекунад ва як қатор тиҷорати дигарро анҷом медиҳад. Боқимондаҳо бошанд пасмонда мегарданд.
Мардум суол мекунанд, ки чаро ҳама гуна тиҷорат ба як даст афтод? Байни мову онҳо чи фарқияте вуҷуд дорад? Нафароне ҳастанд, ки Ҳегел (файласуфи олмонӣ – таҳр.) –ро бо Бобель (адиби рус – таҳр.) омехта мекунанд, маълумоти махсус надоранд, вале дар як даст корхонаҳои зиёде доранд. Дар айни замон шахсоне ҳастанд, ки курсҳои махсусро бо маълумоти олӣ хатм кардаанд, вале манбаъҳои қарзӣ, тиҷоратӣ ва ғайра ба онҳо дастрас нест», гуфт Токаев.
Ба гуфтаи президент, ин боиси афсурдагӣ, нобоварӣ дар ҷомеа, нобоварӣ ба адолат ва ба ҳама паёмадҳои иҷтимоию сиёсӣ мегардад. Вай инчунин ба мавзӯи нобаробарии ичтимой, ки ба қавли ӯ сабабгори воқеаҳои моҳи январ ки дар мамлакат воқеъ гардид, кайд кард. «Тафовути байни сарватмандон ва камбизоатон ба сатҳи ғайри қобили қабул расидааст. Дар пасманзари фасод, ки шумо хуб медонед, чунин табақабандӣ дар даромад нақши гугирд ва борутро бозид, ки аз он террористон, ҷангиён ва иғвогарон истифода бурдаанд”, гуфт Токаев.
Қобили зикр аст, ки Токаев, ки аз соли 2019 дар сари қудрат аст, ҳоло дар ин бора сӯҳбатро оғоз кард. Пас аз саркӯби бераҳмонаи эътирозгарон, президент як қатор тасмимҳоро эълон кард, ки ҳадафи он нуфузи Назарбоев ва оилаашро дар сиёсат ва иқтисод маҳрум кардан мебошад. Масалан, маҷлиси Қазоқистон тағйиру иловаҳоеро қабул кард, ки бар асоси он раисҷумҳури собиқ Нурсултон Назарбоев дар маҷлиси мардумии Қазоқистон (АНК) ва Шўрои амнияти ҷуҳурӣ аз раёсати якумра маҳрум карда мешавад. Инчунин, бо қарори ҳукумат, фаъолияти ҶДММ «Оператор РОП», ки ба Алия Назарбоева алоқаманд буд ва аз истеҳсолкунандагон маблағи коркарди партовҳоро меситонид, боздошта шуд — ба ҷои ин президент дастур дод, ки «Фонди мардуми Қазоқистон» таъсис дода шавад ва аз ҳисоби ҳиссаҷудокунии монополия ва корхонаҳои калон пур карда шавад. Илова бар ин, Токаев нақши Назарбоевро дар пайдоиши табақаи одамони «бой аз рӯи меъёрҳои байналмилалӣ» дар кишвар алоҳида қайд кард.
Коршиносон қайд мекунанд, ки Токаев бо ин роҳ кӯшиш мекунад, ки эътимоди гумшудаи мардумро дубора ба даст орад, бахусус пас аз он, ки ӯ фармон дод, ки эътирозгаронро ба қатл расонанд ва мудохилакорони хориҷиро барои ором кардани мардум даъват кунанд. Таҳлилгарон бар он ақидаанд, ки дар ояндаи наздик ӯ дар бисёр бахшҳо тағйиротҳо ворид мекунад, ки хусусияти популистӣ хоҳад дошт.
