Раҳмон аз исрофкорӣ нигарон аст
Эмомалӣ Раҳмон, раисҷумҳури Тоҷикистон дар суханронии табрикотии худ ба муносибати иди Қурбон аз мардуми кишвар даъват кард, ки аз исрофкорӣ ва “худнамоишкунӣ” парҳез карда, ба ҷои он ба корҳои хайру савоб даст бизананд ва ба ниёзмандон кӯмак кунанд, хабар медиҳад дафтари матбуотии раисҷумҳур.
«Боварӣ дорам, ки дар рӯзҳои таҷлили Иди Қурбон – анъанаи пуштибонии ҳамдигар, таҳаммулпазирӣ, саховатмандӣ – ҳамватанони мо ба ҷои харҷҳои беҳуда корҳои хайру савобро анҷом медиҳанд, ба ниёзмандону ятимону маъюбон оилаҳои камтаъмин ва ободонии Ватан мусоидат мекунанд», — гуфт ӯ.
Қобили зикр аст, ки дар остонаи идҳои исломӣ чанд сол боз Эмомалӣ Раҳмон ба худдорӣ аз исрофкорӣ ва худнамоишкунӣ даъват мекунад, дар ҳоле ки режим ҷашнҳои ғайриисломӣ, аз қабили Наврӯз, Сада, Меҳргон ва ҷашнҳои каду, харбуза, асал ва ғайраро дар миқёси калон ҷашн мегирад. Илова бар ин, ҳар як сафари сарони давлатҳои хориҷӣ бо исрофкориҳои бузург ва худнамоишкунӣ ҳамроҳӣ мекунад: масалан, дар ҷараёни сафари охирини раисиҷумҳури Русия Путин ба Тоҷикистон, шабакаҳои телевизионии маҳаллӣ фаровонӣ ва гуногунии таомҳо, меваю нӯшокиҳоро намоиш доданд.
