Китоби навбатии Раҳмон акнун дар бораи сиёсат
Чи тавре ки ОИ «Азия-Плюс» иттилоъ медиҳад Эмомалӣ Раҳмон китоби навбатӣ бо номи «Дар бораи муаммоҳои муҳими сиёсати хориҷӣ ва ташаббусҳои Ҷумҳурии Тоҷикистон» навиштааст.
Нашрия аз 366 саҳифа иборат буда, бо забони тоҷикӣ навишта шудааст. Маҷмӯаи мазкур аз паёмҳои парлумонӣ, баромадҳо, сухангӯйиҳо, аз мусоҳиба ва баёнотҳои Раҳмон барои матбуот иборат мебошад. Китоб аз ду қисм ва замимаҳо ташкил ёфтааст, ки қисми якуми маҷмӯа доир ба муаммоҳои муҳим ва самтҳои асосии сиёсати хориҷии Тоҷикистон дар ду даҳсолаи охир нигаронида шудааст. Маводҳои қисми дуюм бошад ташаббусҳои Раҳмон дар сиёсати байналмиллалӣ оиди муаммоҳои обӣ ва дигаргуниҳои иқлими ҷаҳонӣ, инчунин, роҳҳои ҳалли бӯҳрони афғонӣ ва ҳоказо ифода ёфтааст.
Мушоҳидон қайд мекунанд, ки тӯли солҳои дароз дар Тоҷикистон харидан ва азхуд намудани китобҳои навиштаи Эмомалӣ Раҳмон ба мардум маҷбур карда мешавад. Дар навбати аввал мансабдорон, инчунин, коркунони муассисаҳои буҷавӣ, мактабхонон ва донишҷӯёни донишгоҳҳои олӣ маҷбур карда мешаванд.
