Дар Тоҷикистон ба нуқтаи сарҳадӣ ҳамла карда шуд
Шаби 6-уми ноябр соати 3:20 дақиқа бо вақти маҳаллӣ дар наздикии 60 км аз пойтахти Тоҷикистон яке аз ҳодисаҳои шадидтарин дар минтақа рух дод.
Бинобар маълумоти Кумитаи давлатии амнияти миллӣ (КДАМ) Тоҷикистон, 20 нафар мусаллаҳон ба нуқтаи сарҳадии «Ишқобод» дар сарҳадӣ бо Ӯзбекистон бо 4 нақлиёти сабук омада ҳамла намуданд. Ба ақидаи ҳукумат, ҳамлагарон панҷ адад автомати тамғаи Калашниковро аз сарҳадбонон ғасб намуданд.
«Дар натиҷаи амалиёти сохторҳои қудратӣ 15 нафар мусаллаҳони гурӯҳи ҷиноятӣ, ки ба муҳосира гирифтаанд, нобуд карда шуда 5 нафари дигар дастгир карда шуд. Дар вақти амалиёт як сарҳадбон ва корманди милиса кушта шуд», — иттило медиҳад мақомоти сарҳадӣ.
Шахсоне, ки ба нуқтаи сарҳадӣ ҳамла карданд ҷангҷӯёни гурӯҳи «Давлати Исломӣ» мебошанд, иттило дод рӯзи чоршанбе хадамоти матбуотии КДАМ Тоҷикистон. Ба гуфтаи хадамот, дар рафти пурсиши дастгиршудагон муайян карда шуд, ки гӯё ҷангҷӯён 3-уми ноябр аз тарафи Қалъаи-Золи деҳаи Қундузи Афғонистон ба ноҳияи Қубодиёни Тоҷикистон дохил шуданд. Баъзе аз манобеъ хабар медиҳанд, ки дар миёни ҳамлагарон занҳо низ иштирок доштанд.
ВКД Тоҷикистон хабар додааст, ки дар рафти амалиёт 4 адад нақлиёти сабукраве, ки ҷангҷӯён бо воситаи он мехостанд пинҳон шаванд нобуд карда шудаанд.
Дар суратҳое, ки сомонаи ВКД Тоҷикистон нашр кардааст, возеҳу равшан намоён шуда истодааст, ки рақами давлатии ду нақлиёт якеи он тамғаи Mazda — 9336 НН 01, ва дигаре тамғаи Opel ва рақами давлатияш бо панҷараи радиатор пӯшонида шудааст, вале маълум аст, ки рақами минтақа 01 мебошад. Ғайр аз ин, дар сурат яке аз ҷангҷӯёни кушташуда бо рӯяш ба замин хоб мебошад, вале дастҳояш ба пушт тобдода шуда дастбанд дорад. Ҷолиби диққат аст, ки суратҳои мазкур пас аз нашр шудан дар сомонаи ВКД ҳамоно кӯр карда шудааст.
Тафсилот ва ҷузъиёти дигари ин ҳодисае, ки расман пешниҳод шудааст, дар назди мушоҳидон шубҳаро ба миён овард. Гурӯҳи «Давлати Исломӣ» то ҳол ҳамларо ба ӯҳда нагирифтааст. Масофаи байни нуқтаи гузаштани сарҳади Афғонистону Тоҷикистон ва нуқтаи сарҳадие, ки ба ҳамла дучор гардид зиёда аз 100 км-ро ташкил медиҳад. Чи тавр гурӯҳи иборат аз 20 нафар тавонист чунин масофаро бидуни мамониат, якчанд ҷои навбатдориро убур карда гузаштааст, то ҳол номаълум мебошад. Инчунин бояд қайд намуд, ки гузаргоҳи нақлиётӣ дар он нуқтаи сарҳадӣ вуҷуд надорад, дар паси нуқтаи сарҳади байни ду кишвар қаторкӯҳҳо мавҷуданд.
Сиёсатшиноси маъруф ва мутахассиси портали Фергана.ру Аркадий Дубнов оиди ҳодисае, ки расмиҳо пешниҳод карданд шубҳаҳои худро изҳор намуд.
«Назарияи махфиёнаро тоқат надорам, вале дар хусуси аз гурӯҳи «ДИ» будани ҳамлагарон шубҳаҳои ҷиддӣ дорам», — хабар дод ӯ ба ҳафтаномаи Коммерсант. Якум, худи «ДИ» ин ҳамларо ба ӯҳда нагирифтааст. Дуюм, ин чи гуна ҷангҷӯён ҳастанд, ки бе мамониат ба кушта партофтани худ розӣ ҳастанд, ҳол он ки пештар худи онҳо тавонистанд сарҳадро бидуни монеа убур намуда, то нуқтаи сарҳадӣ садҳо километрро тай намуданд Гузашта аз ин, онҳо ба рӯйҳояшон ниқоб доштанд, тӯли солҳои охир ягон ҳамлае бо ниқобдорон карда нашудааст. Ман гумон мекунам, ки онҳо маҳбусоне ҳастанд, ки ба ин кор равона карда шудаанд. Мақомотҳои қудратии тоҷик беномусанд ва кордон нестанд ва аз тарафи онҳо ҳар чиро интизор шудан мумкин аст», — қайд намуд мутахассис.
Дар саҳифаи Фейсбук Дубнов менависад:
«…Вазъият пас аз омадани Котиби шӯрои амнияти Русия, Патрушев ба Тоҷикистон ва Ӯзбекистон шиддатнок гардид, ки муаммои «ситезаҷӯӣ ва хатарҳои амниятӣ» дар минтақа ва дар ҳамсоякишвари Афғонистон муҳокима намуда шуд. Марҳамат, «ситезаҷӯӣ» дар назди шумост…!».
Бояд зикр кард, ки мавзӯи таҳдиди ҳамлаоварӣ ба кишварҳои Осиёи Марказӣ аз ҷониби гӯё ҷангҷӯёни Афғонистон тӯли якчанд сол аст, ки аз тарафи Русия бо мақсади сафедкунии истилои низомии худ дар минтақа, хусусан дар Тоҷикистон карда мешавад, ки алҳол ду базаи ҳарбии он дар Тоҷикистон фаъолият дорад: яке аз онҳо дар пойтахти кишвар ҷойгир шудааст. Санаи 16-уми октябр палатаи поёнии парлумони Тоҷикистон Созишномаи оиди тартиботи ташаккулдиҳӣ ва истифодабарии гурӯҳи мутахассисони муштараки хадамотҳои сарҳадӣ барои ба хатарҳои сарҳадӣ фавран эътино нишон додан дар сарҳади бурунмарзии баъзе аз кишварҳои собиқ Иттиҳоди Шӯравиро тасдиқ намуд. Инчунин, охирҳои моҳи октябр маълум гардид, ки Русия барои ҳимояи базаи ҳарбии худ ва мудофиаи ҳавоӣ системаи мушакҳои ҳавоии С-300ПС ро ирсол намуд.
